សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU) ថ្កោលទោសចំពោះការប្រើប្រាស់អំពើហិង្សាលើប្រធានសហជីពប្រចាំរោងចក្រស្តាឡៃថ៍ អឹភេរែល (STARLIGHTAPPAREL)។ មន្ត្រីសង្គមស៊ីវិល និងសហជីព ស្នើដល់អាជ្ញាធរ ឲ្យពន្លឿនតាមចាប់ជនល្មើសមកទទួលទោសតាមច្បាប់។
សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ឬហៅកាត់ថា ស៊ីខៅឌូ (C.CAWDU) ថ្កោលទោសចំពោះករណីជនមិនស្គាល់មុខ បានប្រើប្រាស់អំពើហិង្សា បណ្ដាលឲ្យប្រធានសហជីពប្រជាធិបតេយ្យកម្មករ ប្រចាំក្រុមហ៊ុន ស្តាឡៃថ៍ អឹភេរែល លោក ស៊ីន ណាក់ រងរបួសក្បាលធ្ងន់ធ្ងរ កាលពីថ្ងៃទី២៤ ខែមករា។
ការថ្កោលទោសនេះ ធ្វើឡើងនៅក្នុងសេចក្ដីថ្លែងការណ៍របស់សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា កាលពីរសៀលថ្ងៃទី ៤ ខែកុម្ភៈ ដែលឲ្យដឹងថា នៅមុនករណីអំពើហិង្សានេះ កើតឡើង គឺកាលពីថ្ងៃទី២០ ខែមករា លោក ស៊ីន ណាក់ បានចូលរួមដោះស្រាយវិវាទការងាររបស់កម្មករចំនួន ២ចំណុច ដែលមានតំណាងក្រុមហ៊ុនចំនួន ២នាក់ និងពុំទទួលបានលទ្ធផលសះជាឡើយ ។ បន្ទាប់មកនៅថ្ងៃទី២១ ខែមករា ស៊ីខៅឌូ បានដាក់ពាក្យទៅនាយកដ្ឋានដោះស្រាយវិវាទការងារ ដើម្បីបន្តរកដំណោះស្រាយ។ លុះដល់ថ្ងៃទី២៤ ខែមករា លោក ស៊ីន ណាក់ បានចូលរួមដោះស្រាយវិវាទការងារជូនកម្មករ ហើយទាស់ពាក្យសម្ដីជាមួយនឹងគ្រូពេទ្យប្រចាំនៅរោងចក្រស្ដាឡៃថ៍ ។ នៅរសៀលថ្ងៃដដែលនោះ លោក ស៊ីន ណាក់ ត្រូវបានជនមិនស្គាល់អត្តសញ្ញាណ កាប់ពីក្រោយបណ្ដាលឲ្យរងរបួសធ្ងន់ត្រង់ក្បាល នៅខាងមុខរោងចក្រស្ដាឡៃថ៍ ដែលមានទីតាំងស្ថិតនៅឃុំវិហារសួគ៍ ស្រុកខ្សាច់កណ្ដាល ខេត្តកណ្ដាល ។ ភ្លាមៗបន្ទាប់ពីហេតុការណ៍បានកើតឡើង គ្រួសារបានដាក់ពាក្យបណ្ដឹងនៅប៉ុស្តិ៍នគរបាលវិហារសួគ៍។
ស៊ីខៅឌូ ឲ្យដឹងថា គិតមកទល់នឹងថ្ងៃនេះ អាជ្ញាធរនៅមិនទាន់ឃាត់ខ្លួន ជនល្មើសបាននៅឡើយទេ។
អនុប្រធានសហជីពប្រជាធិបតេយ្យកម្មករកាត់ដេរកម្ពុជា (C-CAWDU) លោក អាត់ ធន់ ប្រាប់អាស៊ីសេរី នៅថ្ងៃទី៤ ខែកុម្ភៈថា អាជ្ញាធរ គួរតែពន្លឿនតាមចាប់ខ្លួនជនបង្ក និងផ្ដន្ទាទោសតាមច្បាប់។
លោក អាត ធន់៖«អាជ្ញាធរត្រូវតែរកជនដៃដល់ មកផ្ដន្ទាទោស ព្រោះបើមិនអីចឹងទេ គាត់អាចបង្កបញ្ហាហ្នឹងបន្តទៀតដល់ជនស្លូតត្រង់ ឬជនរងគ្រោះផ្សេងៗទៀត ជាពិសេសគឺថ្នាក់ដឹកនាំសហជីព ហើយវាជាគំរូអាក្រក់ដែលធ្វើឲ្យព័ត៌មានចេញទៅខាងក្រៅមិនល្អ អំពីការធ្វើទុក្ខបុកម្នេញ ឬការគំរាមកំហែង ឬការបំភិតបំភ័យដល់ថ្នាក់ដឹកនាំសហជីព ដែលវាជះឥទ្ធិពលចំពោះប្រទេសជាតិផង ក្រុមហ៊ុនផង ប៉ះពាល់ដល់អ្នកបញ្ជាទិញផ្សេងៗទៀតផង ។ អីចឹងខ្ញុំគិតថា អាជ្ញាធរត្រូវស្រាវជ្រាវឲ្យបានច្បាស់លាស់ករណីមានអំពើហិង្សាអីចឹង»។
វិទ្យុអាស៊ីសេរី នៅមិនទាន់អាចទាក់ទងភាគីក្រុមហ៊ុន ស្តាឡៃថ៍ ដើម្បីសុំការឆ្លើយតបជុំវិញបញ្ហានេះ បាននៅឡើយទេ នៅថ្ងៃទី៤ ខែកុម្ភៈ។ ចំណែក ស្នងការ នៃស្នងការដ្ឋាននគរបាលខេត្តកណ្ដាល លោក ឈឿន សុចិត្ត ក៏វិទ្យុអាស៊ីសេរី មិនអាចទាក់ទងបានដែរ ដោយទូរស័ព្ទចូល តែត្រូវចុចបិទ។
មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក (ADHOC) លោក យី សុខសាន្ត មានប្រសាសន៍ថា អាជ្ញាធរ គួរតែស្រាវជ្រាវ និងស្វែងរកជនបង្ក ឲ្យមកផ្ដន្ទាទោសតាមច្បាប់ ដើម្បីឲ្យពលរដ្ឋមានជំនឿលើអាជ្ញាធរ។
លោក យី សុខសាន្ត៖«ក្នុងនាមខ្ញុំជាអ្នកការពារសិទ្ធិមនុស្សរបស់សមាគមអាដហុក ខ្ញុំយល់ថា រដ្ឋាភិបាលក៏ដូចជាអាជ្ញាធរដែនដី មេត្តាពន្លឿនចាត់វិធានការឲ្យបានលឿនបំផុតទៅលើអ្នកប្រើហិង្សាទាំងអស់នោះទៅតាមផ្លូវច្បាប់។ បើមិនអីចឹងទេ ប្រជាពលរដ្ឋយើងលែងមានជំនឿលើរាជរដ្ឋាភិបាល ក៏ដូចជាអាជ្ញាធរទៀតហើយ»។
កន្លងទៅ ករណីជនមិនស្គាល់មុខ ប្រើប្រាស់អំពើហិង្សាលើសកម្មជនសហជីព សកម្មបរិស្ថាន និងសកម្មជនគណបក្សនយោបាយប្រឆាំងជាដើម អាជ្ញាធរមិនដែលរកឃើញជនបង្កឲ្យមកទទួលខុសត្រូវតាមច្បាប់នោះឡើយ។ ជាក់ស្ដែងករណីប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ លោក វន់ ពៅ ដែលត្រូវបានទាហាន នៃកងឆ័ត្រយោង៩១១ ចាប់ខ្លួន និងវាយឱ្យរងរបួសធ្ងន់ធ្ងរមុននឹងបញ្ជូនទៅឃុំនៅពន្ធនាគារត្រពាំងផ្លុង កាលពីដើមខែមករា ឆ្នាំ២០១៤ ក្នុងពេលចូលរួមឃ្លាំមើល ការធ្វើបាតុកម្មរបស់កម្មករនៅរោងចក្រយ៉ាក់ជីន ក៏អាជ្ញាធរនៅមិនទាន់ស្វែងរកជនបង្ក និងផ្ដល់យុត្តិធម៌សម្រាប់លោកដែរ។
ទោះជាយ៉ាងណា សហជីព និងមន្ត្រីសង្គមស៊ីវិល ចង់ឃើញអាជ្ញាធរ ស្វែងរកជនល្មើសឲ្យមកទទួលទោសតាមច្បាប់ និងបញ្ចប់វប្បធម៌និទ្ទណ្ឌភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។