រយៈពេល៩ឆ្នាំហើយ ដែលគណៈកម្មការពិសេសមួយបង្កើតឡើង ដោយ អតីតនាយករដ្ឋមន្ត្រី លោក ហ៊ុន សែន កាលពីឆ្នាំ២០១៥ នៅមិនទាន់បង្ហាញ ព័ត៌មានអ្វីទាំងអស់ ពាក់ព័ន្ធនឹង ឃាតកម្មអតីតមេដឹក នាំសហជីពលោក ជា វិជ្ជា។
សាច់ញាតិរបស់មេដឹកនាំ សហជីពរូបនេះ លើកឡើងថា អ្នកដែលបញ្ជាឱ្យ បាញ់សម្លាប់លោក ជា វិជ្ជា គឺជាអ្នកធំនិងមានអំណាចនៅកម្ពុជា ដូច្នេះទើប សមត្ថកិច្ចមិនហ៊ានចាត់ការ ហើយបានត្រឹមតែឆ្លើយថា សំណុំរឿងនេះ កំពុងបន្តស៊ើបអង្កេត។
អតីតប្រធានសហជីពសេរីកម្មករដ៏ល្បីល្បាញ លោក ជា វិជ្ជា ត្រូវបានឃាតកបាញ់ សម្លាប់ទាំងកណ្ដាលថ្ងៃ ២០ ឆ្នាំមកហើយ ប៉ុន្តែមកដល់ពេលនេះ សមត្ថកិច្ចមិន អាចចាប់ខ្លួនខ្មាន់កាំភ្លើង ព្រមទាំងអ្នកពាក់ព័ន្ធនៅពីក្រោយខ្នង ទោះបីជាអតីត ប្រមុខរដ្ឋាភិបាលលោក ហ៊ុន សែន បានបង្កើតគណៈកម្មការស៊ើបអង្កេតពិសេស មួយ ដើម្បីស្រាវជ្រាវរកឃាតកពិត យកមកផ្ដន្ទាទោសក៏ដោយ។
គណៈកម្មការពិសេសនេះ មានសមាសភាពពីក្រសួងមហាផ្ទៃ ក្រសួងការងារ ក្រសួងយុត្តិធម៌ ទីស្ដីការគណៈរដ្ឋមន្ត្រី អគ្គស្នងការដ្ឋាននគរបាលជាតិ រួមទាំង សមត្ថកិច្ចពាក់ព័ន្ធមួយចំនួន មានភារកិច្ចការងារចុះស្រាវជ្រាវ ឱ្យបានគ្រប់ជ្រុងជ្រោយលើអង្គហេតុនិងអង្គច្បាប់ ប្រមូលព័ត៌មាននិងភស្តុតាងពាក់ព័ន្ធនឹង ឃាតកម្មលើលោក ជា វិជ្ជា។
ប៉ុន្តែរយៈពេល៩ឆ្នាំមកហើយ គណៈកម្មការនេះ មិនទាន់ឃើញបង្ហាញលទ្ធផលអ្វី ទាំងអស់ ទាក់ទងនឹងឃាតកម្មលើលោក ជា វិជ្ជា នៅឡើយ។
ចំណែកឯរដ្ឋាភិបាលថ្មី ដែលដឹកនាំដោយលោក ហ៊ុន ម៉ាណែត ជាកូនប្រុសរបស់លោក ហ៊ុន សែន ក៏មិនទាន់បានបង្ហាញសញ្ញាណាមួយអំពីការប្រឹងប្រែង ស៊ើបអង្កេតរកឃាតកពិតនោះទេ។
វិទ្យុអាស៊ីសេរីមិនអាចសុំការអត្ថាធិប្បាយបញ្ហានេះ ពីអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ ចាប់តាំងពីថ្ងៃទី ១៦មករា ដល់ថ្ងៃទី ២១មករា ខណៈអ្នកនាំពាក្យរងនៃក្រសួងមហាផ្ទៃលោក ទូច សុខៈ បានប្រាប់វិទ្យុអាស៊ីសេរី កាលពីថ្ងៃ ១៦មករា ថា ក្រសួងមហាផ្ទៃអាចខ្វះចន្លោះ ក្នុងការអត្ថាធិប្បាយ អំពីរឿងនេះ ហើយបានប្រាប់ឱ្យអ្នកសារព័ត៌មានអាស៊ីសេរីទៅសួរខាងអគ្គស្នងការ នគរបាលជាតិ។
លោក ទូច សុខៈ៖ «ក្នុងនោះបើយល់ល្អ ប្អូនទាក់ទងអគ្គស្នងការនគរបាលជាតិវិញដោយសារតែលោកក្ដាប់រឿងហ្នឹងជាប្រចាំ ដោយឡែក ក្រសួងមហាផ្ទៃនៅពីលើជាអ្នកគ្រប់គ្រងទៅលើគោលនយោបាយដឹកនាំ» ។
នៅពេលអ្នកយកព័ត៌មាន របស់អាស៊ីសេរីទាក់ទង ទៅកាន់អគ្គស្នងការនគរបាល ជាតិ លោក ស ថេត មេនគរបាលជាតិរូបនេះសុំមិនធ្វើអត្ថាធិប្បាយ ដោយឱ្យអ្នកសារព័ត៌មានវិទ្យុអាស៊ីសេរី ទាក់ទងទៅកាន់អ្នកនាំពាក្យអគ្គស្នងការដ្ឋាននគរបាលជាតិវិញ។
លោក ស ថេត៖«អត់ទេសួរៗ ទៅអ្នកនាំពាក្យរបស់អគ្គស្នងការណា៎ខ្ញុំបានប្រគល់ ភារកិច្ច ជូនអ្នកនាំពាក្យអគ្គស្នងការរួចអស់ហើយ ទាក់ទងទៅ»។
វិទ្យុអាស៊ីសេរីបានទាក់ទងទៅអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន តាមទូរសព្ទ និងបានផ្ញើសារតាមប្រព័ន្ធតេឡេក្រាម (Telegram) របស់លោកចាប់តាំងថ្ងៃទី ១៧ មករា ប៉ុន្តែរហូតមកដល់ថ្ងៃផ្សាយ នេះ មិនទាន់មានការឆ្លើយតបចំពោះសំណួររបស់វិទ្យុអាស៊ីសេរី ដែលផ្ញើជូន លោក នៅឡើយ។
ចំណែកអ្នកនាំពាក្យក្រសួងយុត្តិធម៌ លោក ជិន ម៉ាលីន វិញ បដិសេធធ្វើ អត្ថាធិប្បាយក្រោមហេតុផលថា ស្ថាប័នរដ្ឋមិនផ្ដល់ព័ត៌មានដល់អ្នកសារព័ត៌មាន អាស៊ីសេរី ខណៈអ្នកនាំពាក្យក្រសួងការងារលោក កត្ដា អ៊ន អ្នកសារព័ត៌មានវិទ្យុ អាស៊ីសេរី បានទូរស័ព្ទនិងផ្ញើសំណួរតាមប្រព័ន្ធតេឡេក្រាម តែក៏គ្មានការឆ្លើយតបដែរ។
រីឯប្រធានអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី លោក ទិត សុធា វិញ វិទ្យុអាស៊ីសេរី មិនអាចសុំការអត្ថាធិប្បាយបានទេ នៅថ្ងៃទី ២១ មករា ដោយមានអ្នកចុចផ្ដាច់ទូរស័ព្ទ ពេលអ្នកសារព័ត៌មានអាស៊ីសេរី សួររឿងឃាតកម្ម លោក ជា វិជ្ជា។
លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវ បានខ្មាន់កាំភ្លើងបាញ់សម្លាប់ នៅតូបលក់កាសែត កែងរបងវត្តលង្ការាជធានីភ្នំពេញ ខណៈលោកកំពុងអានកាសែត នៅព្រឹកថ្ងៃទី ២២ ខែមករា ឆ្នាំ២០០៤។
ឃាតកម្មនេះ កើតឡើងក្នុងពេលដែលប្រទេសកម្ពុជាកំពុងជួបវិបត្តិនយោបាយ រវាងគណបក្សធំ៣ គឺគណបក្សប្រជាជនកម្ពុជា គណបក្សហ៊្វុនស៊ិនប៉ិច និង គណបក្ស សម រង្ស៊ី ដែលជាប់គាំងមិនអាចសម្របសម្រួលគ្នាបង្កើតរដ្ឋាភិបាលថ្មីបាន នៅក្រោយការបោះឆ្នោតឆ្នាំ២០០៣ នៅពេលគណបក្សហ៊្វុនស៊ិនប៉ិច និងគណបក្ស សម រង្ស៊ី កាលនោះ រួមគ្នាប្រកាសមិនទទួលស្គាល់លទ្ធផល បោះឆ្នោត កាលពី២០ឆ្នាំមុន។
ប្អូនប្រុសលោក ជា វិជ្ជា គឺលោក ជា មុនី ដែលធ្លាប់ទទួលការងារជាប្រធាន សហជីពសេរីកម្មករ បន្ទាប់ពីការស្លាប់របស់បងប្រុស និង បច្ចុប្បន្នជាអនុប្រធាន គណបក្សកម្លាំងជាតិ បានប្រាប់វិទ្យុអាស៊ីសេរីថា រយៈពេល២០ឆ្នាំមកនេះ គ្មានពន្លឺយុត្តិធម៌ឡើយ ទោះបីជាមានតម្រុយពីអ្នកពាក់ព័ន្ធផ្សេងៗក៏ដោយ ប៉ុន្តែសមត្ថកិច្ចដូចជាមិនអើពើស៊ើបអង្កេតនោះទេ។
លោកថា ពួកគាត់ជាសាច់ញាតិមានការឈឺចាប់ខ្លាំង នៅពេលសមត្ថកិច្ចមិនទាន់ ចាប់ខ្លួនឃាតកពិត និងអ្នកពាក់ព័ន្ធដែលនៅពីក្រោយខ្នងនៃអំពើឃាតកម្មមកផ្ដន្ទា ទោស។
លោក ជា មុនី៖ «ឃាតកម្មនេះ មានលក្ខណៈសម្លាប់ ប៉ុនប៉ងសម្លាប់ដោយប្រព័ន្ធតែម្ដងបាទ ដោយប្រព័ន្ធហើយការសម្លាប់ហ្នឹងទៀត សុទ្ធសឹងតែអ្នកធំៗ ណាស់ អ្នកមានអំណាចដូចការដែលលោក ជា វិជ្ជាធ្លាប់ទៅបំភ្លឺ នៅស្នងការភ្នំពេញ អ៊ីចឹងគេប្រាប់ថា អ្នកប៉ុនប៉ងសម្លាប់គាត់ហ្នឹងធំណាស់ មានអំណាចណាស់។ អ៊ីចឹង! អាធំហើយមានអំណាចហើយដែលធ្វើឃាតកម្មលើ លោក ជា វិជ្ជា ទៅមេដឹកនាំសហជីពនានា លើឥស្សរជននយោបាយ សូម្បីតែនៅលើព្រះសង្ឃ សំ ប៊ុនធឿន ក៏ដោយសុទ្ធសឹងរកឃាតកមិនឃើញ»។
ក្នុងសំណុំរឿងឃាតកម្មលើលោក ជា វិជ្ជា ដំបូងអាជ្ញាធរធ្លាប់បានចាប់ខ្លួនលោក ប៊ន សំណាង និងលោក សុខ សំអឿន ដាក់ក្នុងពន្ធនាគាររយៈពេលប្រមាណ ៨ឆ្នាំឱ្យទទួលខុសត្រូវ។ ប៉ុន្តែអ្នកលក់កាសែត ដែលស្ថិតក្នុងហេតុការណ៍អំឡុង ពេលឃាតកបាញ់សម្លាប់លោក ជា វិជា្ជ និងមជ្ឈដ្ឋាននានា រួមទាំងក្រុមគ្រួសារ របស់លោក បានអះអាងថា លោក ប៊ន សំណាង និងលោក សុខ សំអឿន គ្រាន់តែឃាតកសិប្បនិមិត្តប៉ុណ្ណោះ មិនមែន ជាឃាតកពិតនោះទេ។
បន្ទាប់ពីឃុំខ្លួនអស់រយៈពេលប្រមាណ ៨ឆ្នាំនោះ តុលាការកំពូលបានសម្រេចឱ្យ ឃាតកសិប្បនិមិត្តទាំងពីររូប រួចផុតពីបទចោទឃាតកម្មគិតទុកជាមុនលើលោក ជា វិជ្ជា និងដោះលែងពួកគាត់ឱ្យមានសេរីភាព។
យ៉ាងណា អាជ្ញាធររដ្ឋមិនបានសងជំងឺចិត្តឱ្យលោក ប៊ន សំណាង និងលោក សុខ សំអឿន ចំពោះការសម្រេចសេចក្ដីខុស ឱ្យពួកគាត់ជាប់ពន្ធនាគារ៨ឆ្នាំនោះឡើយ ហើយបន្ទាប់ពីចេញពីគុក បុរសរងគ្រោះទាំងពីរនាក់ ហាក់បាក់ស្មារតី ដោយ មិនហ៊ាននិយាយអ្វីទាំងអស់ទាក់ទងនឹងរឿងនេះ។
ទីប្រឹក្សាគណបក្សកម្លាំងជាតិ និងជាមិត្តភក្ដិជិតស្និទ្ធនឹងលោក ជា វិជ្ជា គឺលោក រ៉ុង ឈុន ប្រាប់វិទ្យុអាស៊ីសេរីថា រដ្ឋាភិបាលបង្កើតគណៈកម្មការស៊ើបអង្កេត គ្រាន់តែ បង្គ្រប់កិច្ចនិងឱ្យល្អមើល ដើម្បីបំភ័ន្តភ្នែកអន្តរជាតិប៉ុណ្ណោះ។
លោកយល់ថា អាជ្ញាធរកម្ពុជាមានសមត្ថកិច្ចក្នុងការស្រាវជ្រាវនិងវែកមុខឃាតក យកមកផ្ដន្ទាទោសតាមច្បាប់ ប៉ុន្តែ ដោយសារឃាតកម្មនេះ ជាប់ពាក់ព័ន្ធនឹងមន្ត្រី ដែលមានឋានៈនិងអំណាចធំ។
លោក រ៉ុង ឈុន៖ «អ៊ីចឹងបានជាឃាតកម្មលើលោក ជា វិជ្ជាមកពេលនេះ ២០ ឆ្នាំហើយ នៅតែវែកមុខរកឃាតកហ្នឹង អ្នកនៅក្រោយខ្នងឃាតក យកមកផ្ដន្ទាទោស មិនបាន ទោះបីមានគណៈកម្មការក្ដី មិនអាចស្រាវជ្រាវរកឃាតក ពិតនឹងអ្នកពី ក្រោយបានដែរ» ។
អតីតស្នងការនគរបាលរាជធានីភ្នំពេញ លោក ហេង ពៅ ធ្លាប់ប្រាប់កាសែត បរទេសមុនពេលលោក ហ៊ុន សែន ចាប់ខ្លួនលោកពីប្រទេសម៉ាឡេស៊ី នៅក្នុងខែធ្នូ ឆ្នាំ២០០៦ថា អតីតអគ្គស្នងការនគរបាលជាតិ លោក ហុក ឡង់ឌី បានបញ្ជា ឱ្យលោកចាប់លោក សុខ សំអឿន និងលោក ប៊ន សំណាង ឱ្យទទួលខុស ត្រូវលើការសម្លាប់អតីតប្រធានសហជីពសេរីកម្មករ នៃព្រះរាជាណាចក្រកម្ពុជា លោក ជា វិជ្ជា។
មកដល់ពេលនេះ នៅមានចម្ងល់ជាច្រើន ថា លោក ហុក ឡង់ឌី ជាមនុស្សម្នាក់ ដែល នៅពីក្រោយអំពើឃាតកម្មលើលោក ជា វិជ្ជា ឬមានអ្នកមានអំណាចផ្សេង ទៀតឬក៏យ៉ាងណានោះ ខណៈគណៈកម្មការស៊ើបអង្កេត៩ឆ្នាំ ដែលបង្កើតឡើង ដោយអតីតរដ្ឋាភិបាលលោក ហ៊ុន សែន មិនទាន់បានបង្ហាញអ្វីទាំងអស់នោះ។
ជុំវិញរឿងឃាតកម្មលើមេដឹកនាំសហជីពលោក ជា វិជ្ជា នេះ ក្រុមអង្គការឃ្លាំមើល សិទ្ធិមនុស្សជាតិនិងអន្តរជាតិរិះគន់ថា រដ្ឋាភិបាល លោក ហ៊ុន សែនអាចមាន ជាប់ពាក់ព័ន្ធដោយផ្ទាល់ទៅនឹង ករណីធ្វើឱ្យមានវប្បធម៌និទ្ទណ្ឌភាពនៅក្នុងសង្គម កម្ពុជារហូតមកទល់សព្វថ្ងៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។