សហព័ន្ធខ្មែរកម្ពុជាក្រោមបានបញ្ជូនតំណាងចូលរួមកិច្ចប្រជុំឆ្នាំ២០២៥ ស្ដីអំពីសេរីភាពសាសនាពិភពលោកនៅរដ្ឋធានីវ៉ាស៊ីនតុន រយៈពេលពីរថ្ងៃដើមសប្ដាហ៍នេះ។ ក្នុងកិច្ចប្រជុំនោះ សហព័ន្ធបានជម្រាបជូនមន្ត្រីសហរដ្ឋអាមេរិក មេដឹកនាំសាសនា និងអ្នកជំនាញផ្នែកសិទ្ធិមនុស្សអំពីការធ្វើទុក្ខទុក្ខបុកម្នេញផ្នែកសាសនាពីសំណាក់រដ្ឋាភិបាលវៀតណាមមកលើជនជាតិដើមខ្មែរកម្ពុជាក្រោម។
អនុប្រធានប្រតិបត្តិសហព័ន្ធខ្មែរកម្ពុជាក្រោម លោក ម៉ៅ មុន្នី ប្រាប់អង្គប្រជុំឆ្នាំ២០២៥ ស្ដីអំពីសេរីភាពសាសនាពិភពលោកថា ព្រះសង្ឃកម្ពុជាក្រោមកំពុងធ្វើការធ្វើទុក្ខបុកម្នេញគ្រប់រូបភាពពីសំណាក់ អាជ្ញាធរ និងព្រះសង្ឃវៀតណាម។
លោក ម៉ៅ មុន្នី៖«ខ្ញុំលើកឡើងពីររឿងសំខាន់រឿងទី១ រដ្ឋាភិបាលវៀតណាម ប្រើប្រាស់សាសនាវៀតណាមគាបសង្កត់សាសនាខ្មែរក្រោមយើងហ្នឹង។ សព្វថ្ងៃហ្នឹងគេមានសិទ្ធិបញ្ជាថា អ្នកណាជាព្រះចៅអធិការវត្តខ្មែរក្រោមយើង ហើយពេលខ្មែរក្រោមយើងទៅបួសហ្នឹង ក៏ត្រូវសុំច្បាប់គេដែរ»។
បច្ចុប្បន្នវៀតណាមចាប់ព្រះសង្ឃខ្មែរក្រោម ៥អង្គ និងសកម្មជនសិទ្ធិមនុស្ស ៨នាក់ ដាក់ពន្ធនាគារក្នុងម្នាក់ៗជាច្រើនឆ្នាំដោយសារតែព្រះសង្ឃការពារសិទ្ធិសាសនា ស្របពេលសកម្មជនសិទ្ធិមនុស្សទាមទារសិទ្ធិជនជាតិដើម។ ព្រះសង្ឃ ៥អង្គនោះ រួមមាន ព្រះចៅអធិការវត្តទ្រនំសេក ព្រះតេជព្រះគុណ ថាច់ ចន្ទតារា ត្រូវបានតុលាការវៀតណាមកាត់ទោសដាក់ពន្ធនាគារ ៦ឆ្នាំ និងព្រះតេជព្រះគុណ យឿង ខាយ ៥ឆ្នាំ។ តុលាការវៀតណាមចោទប្រកាន់ព្រះសង្ឃ អំពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ»។ ទោះបីជាយ៉ាងណាក្ដី សហព័ន្ធខ្មែរក្រោមចាត់ទុកការចោទប្រកាន់នេះ គ្រាន់តែជាលេសដើម្បីគាបសង្កត់សិទ្ធិផ្នែកសាសនានិងសិទ្ធសេរីភាពរបស់ខ្មែរក្រោមដើម្បីកុំឲ្យងើបឡើងទាមទារសិទ្ធិស្វ័យសម្រេច។
ក្នុងកិច្ចប្រជុំស្តីពីសេរីភាពសាសនាអន្តរជាតិ កាលពីថ្ងៃទី៤ និង ៥កុម្ភៈ វាគ្មិនផ្ដោតការពិភាក្សាលើប្រធានបទថាតើ របៀបណាទើបពហុសាសនា អាចកសាងស្ថិរភាពនិងសន្តិភាព ស្របពេលនៃ ការបម្លាស់ទី និងការបាត់បង់ផ្ទះសម្បែងបណ្ដាលមកពីជម្លោះ។
លោក ម៉ៅ មុន្នី អះអាងថា តំណាងមេដឹកនាំសាសនាពិភពលោក អង្គការសិទ្ធិមនុស្ស និងមន្ត្រីរដ្ឋាភិបាលសហរដ្ឋអាមេរិក ទទួលបានព័ត៌មានជុំវិញការរំលោភសិទ្ធិសាសនាខ្មែរក្រោម ដែលវៀតណាមកំពុងគ្រប់គ្រង។
លោក ម៉ៅ មុន្នី៖«នេះជាសន្និសីទយើងផ្សព្វផ្សាយព័ត៌មាន និងបញ្ហាដែលយើងកំពុងប្រឈមមុខ ពេលប្រជុំខ្ញុំយកឯកសារខ្មែរក្រោម ទៅដាក់ ទូតវៀតណាមគេយកដែរ។ មនុស្សប្រមាណ មួយពាន់នាក់ចូលរួម ជាអ្នកជំនាញខាងសិទ្ធិមនុស្ស និងសាសនា យើងសង្ឃឹមថា បញ្ហារបស់ខ្មែរក្រោមគេដឹងលឺច្រើន។»
បទ្ថបទដែលទាក់ទង៖
សហព័ន្ធខ្មែរកម្ពុជាក្រោមដាក់គោលដៅបន្តទាមទារសិទ្ធិស្វ័យសម្រេច សម្រាប់ឆ្នាំ២០២៥
ខ្មែរក្រោមធ្វើបាតុកម្មនៅមុខ UN នៅបុរីញូវយ៉ក ទាមទារវៀតណាមឱ្យដោះលែងខ្មែរក្រោមកំពុងជាប់ឃុំ
អាជ្ញាធរវៀតណាម ចាប់ផ្សឹក និងឃុំព្រះកាយព្រះតេជព្រះគុណ ថាច់ ចន្ទតារា នៅកម្ពុជាក្រោម
របាយការណ៍សេរីភាពសាសនារបស់ក្រសួងការបរទេសអាមេរិកផ្សាយសម្រាប់ឆ្នាំ២០២៣ រកឃើញថា ទោះបីរដ្ឋធម្មនុញ្ញវៀតណាមចែងថា បុគ្គលគ្រប់រូបមានសិទ្ធិសេរីភាពខាងជំនឿ និងសាសនា ប៉ុន្តែ ច្បាប់នេះផ្តល់ឲ្យសិទ្ធិរដ្ឋាភិបាលលើការអនុវត្តសាសនា និងរួមបញ្ចូលនូវបទប្បញ្ញត្តិមិនច្បាស់លាស់ ដែលអនុញ្ញាតឱ្យមានការរឹតត្បិតលើសេរីភាពសាសនា ដោយយកលេស ដើម្បីជាផលប្រយោជន៍ នៃសន្តិសុខជាតិ និងឯកភាពសង្គម និងអនុញ្ញាតឱ្យមន្ត្រីមូលដ្ឋានធ្វើការសម្រេចចិត្តតាមអំពើចិត្តលើការចុះឈ្មោះ និងការទទួលស្គាល់ក្រុមសាសនាថ្មី ឬកន្លែងគោរពបូជា។
ជុំវិញការចូលរួម កិច្ចប្រជុំឆ្នាំ២០២៥ ស្ដីអំពីសេរីភាពសាសនាពិភពលោក ក៏ជាផ្នែកនៃយុទ្ធនាការរបស់សហព័ន្ធខ្មែរកម្ពុជាក្រោម ដើម្បីស្នើឲ្យសហគមន៍អន្តរជាតិទទួលដាក់គំនាបឲ្យវៀតណាមដោះលែងព្រះសង្ឃ និងសកម្មជនសិទ្ធិមនុស្សខ្មែរក្រោម។
កាលពីសប្ដាហ៍មុនព្រះសង្ឃ សកម្មជនខ្មែរក្រោម និងតំណាងអង្គការសិទ្ធិមនុស្សអន្តរជាតិ បាននាំគ្នាដាក់ញាតិនៅកុងស៊ុលវៀតណាមនៅរដ្ឋ (California) ដើម្បីទាមទារឲ្យរដ្ឋាភិបាលដោះលែងព្រះសង្ឃ និងសកម្មជនសិទ្ធិមនុស្សខ្មែរក្រោម។ សហព័ន្ធខ្មែរកម្ពុជាក្រោមនឹងបន្តធ្វើយុទ្ធនាការនៅលើឆាកអន្តរជាតិរហូតវៀតណាមដោះលែងព្រះសង្ឃ និងសកម្មជនសិទ្ធិមនុស្សខ្មែរក្រោមទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។