មន្រ្តីស្ថានទូតខ្មែរប្រចាំប្រទេសរុស្ស៊ីបញ្ជាក់ថា រដ្ឋាភិបាលកម្ពុជាមិនទាន់មានផែនការជម្លៀសពលរដ្ឋខ្មែរចេញពីប្រទេសអ៊ុយក្រែន (Ukraine) ទេ ដោយត្រឹមតែទាក់ទងដើម្បីស្វែងយល់ពីស្ថានភាពរបស់ពួកគេ។ ប៉ុន្តែ មន្រ្តីសង្គមស៊ីវិលទទូចដល់រដ្ឋាភិបាលឱ្យធានានូវសុវត្ថិភាព និងការពារអាយុជីវិតពលរដ្ឋ ដែលធានាដោយច្បាប់។
មន្រ្តីស្ថានទូតខ្មែរប្រចាំប្រទេសរុស្ស៊ីបញ្ជាក់ថា ស្ថានទូតពុំមានលទ្ធិភាពជួយអន្តរាគមន៍ជម្លៀសពលរដ្ឋខ្មែរចេញពីប្រទេសអ៊ុយក្រែននោះទេដោយទុកឱ្យរដ្ឋាភិបាលជាអ្នកសម្រេចចិត្តជុំវិញរឿងនេះខណៈដែលសង្គ្រាមរវាងរុស្ស៊ីនិងអ៊ុយក្រែនកំពុងបន្តផ្ទុះឡើងយ៉ាងក្តៅគគុក។
ទីប្រឹក្សាស្ថានទូតកម្ពុជាប្រចាំប្រទេសរុស្ស៊ីលោក ម៉ែន ទន ប្រាប់វិទ្យុអាស៊ីសេរីថា កាលពីថ្ងៃទី២៦ ខែកុម្ភៈ ពលរដ្ឋខ្មែររស់នៅក្នុងប្រទេសអ៊ុយក្រែនបានទាក់ទងមកស្ថានទូតដោយបញ្ជាក់ថា ពួកគាត់មានសុវត្ថិភាពប៉ុន្តែលោកនៅតែព្រួយបារម្ភអំពីស្ថានភាពនិងសុវត្ថិភាពរបស់ពួកគេដែលកំពុងរស់នៅទីនោះខណៈប្រព័ន្ធទំនាក់ទំនងជួបការលំបាកដោយសារប្រទេសរុស្ស៊ីបិទបណ្តាញសង្គមមួយចំនួន។លោកបញ្ជាក់ថារហូតមកដល់ពេលនេះស្ថានទូតនៅមិនទាន់ទទួលការណែនាំពីក្រសួងការបរទេសជុំវិញផែនការជម្លៀសពលរដ្ឋខ្មែរចេញពីប្រទេសអ៊ុយក្រែននៅឡើយទេ។
លោករំពឹងថាក្នុងកាលៈទេសៈសង្គ្រាមបែបនេះពួកគាត់នឹងយល់ច្បាស់អំពីការត្រៀមស្បៀងអាហារនិងការស្វែងរកទីកន្លែងមានសុវត្ថិភាពព្រមទាំងអនុវត្តតាមវិធានការរបស់រដ្ឋាភិបាលរៀងៗខ្លួន៖ «ក៏ប៉ុន្តែរឿងជម្លៀសឬមិនជម្លៀសខ្ញុំអត់បានដឹងទេ សូម្បីជនជាតិថៃដែលមានលទ្ធភាពយកយន្តហោះក៏គេធ្វើអត់កើតដែរ ចឹងដល់ខ្មែរយើងពិបាកមានលទ្ធភាពដូចគេចឹង ខ្ញុំមិនដឹងទេ ទុកឱ្យថ្នាក់លើជាអ្នកសម្រេចចុះ អាហ្នឹងទាល់តែសួរទៅក្រសួងការបរទេសបាទ ខ្ញុំនៅនេះរវល់ការងារមិនទាន់ទទួលព័ត៌មានខាងក្នុងប្រទេសដែរ ព្រោះបណ្តាញមួយចំនួនពិបាកទាក់ទងគ្នា»។
ចំណែកឯនិស្សិតខ្មែរសិក្សាផ្នែកវិស្វកម្មនុយក្លេអ៊ែរនៅប្រទេសរុស្ស៊ីលោក ខឿន ចាន់តូ ឱ្យដឹងថានៅប្រទេសអ៊ុយក្រែនពុំមាននិស្សិតខ្មែរសិក្សានៅទីនោះទេប៉ុន្តែមានពលរដ្ឋខ្មែររស់នៅទីនោះដោយមួយចំនួនពួកគាត់កំពុងស្នាក់នៅក្នុងផ្លូវរថភ្លើងក្រោមដីដើម្បីសុវត្ថិភាពនិងរួចផុតពីគ្រោះថ្នាក់នៃសង្គ្រោម។ លោកបារម្ភពីសុវត្ថិភាពពលរដ្ឋខ្មែរនៅក្នុងប្រទេសអ៊ុយក្រែនដែលកំពុងមានសង្គ្រាមឈ្លានពានពីសំណាក់ប្រទេសរុស្ស៊ី៖ «គាត់ថា ស្ថានភាពនៅអ៊ុយក្រែនក៏រាងវឹកវរដែរ ចឹងគាត់នៅក្រោមមេត្រូដើម្បីមានសុវត្ថិភាព ដោយសារនៅមេត្រូមានជម្រៅជ្រៅក្នុងដី»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសលោក ជុំ សុន្ទរី ដើម្បីបញ្ជាក់ជុំវិញរឿងនេះបានទេ នៅថ្ងៃទី២៧ ខែកុម្ភៈ។
ក្រសួងការបរទេសកម្ពុជា ធ្លាប់ឲ្យដឹងថា អតីតនិស្សិតខ្មែរចំនួន ២៣នាក់ និងក្រុមគ្រួសាររបស់ពួកគេកំពុងរស់នៅប្រទេសអ៊ុយក្រែន (Ukraine)។ កាលពីថ្ងៃទី២៦ ខែកុម្ភៈ លោក ជុំ សុន្ទរី ប្រាប់សារព័ត៌មានក្នុងស្រុកថាកម្ពុជាគ្មាននិស្សិតរៀននៅប្រទេសអ៊ុយក្រែនទេប៉ុន្តែមានតែអតីតនិស្សិតខ្មែរដែលកំពុងរស់នៅទីនោះតាំងពីទសវត្សរ៍ឆ្នាំ១៩៨០ និងខ្លះទៀតតាំងពីទសវត្សរ៍១៩៩០។ លោកថាបច្ចុប្បន្នស្ថានទូតខ្មែរនៅប្រទេសរុស្សី (Russia) កំពុងព្យាយាមទាក់ទងពលរដ្ឋទាំងនោះដើម្បីស្វែងយល់ពីស្ថានភាពរបស់ពួកគេ។
កាលពីថ្ងៃទី២៤ ខែកុម្ភៈ លោកនាយករដ្ឋមន្ត្រី ហ៊ុន សែន ថ្លែងថា លោកចង់ឃើញជម្លោះប្រទេសអ៊ុយក្រែន និងរុស្សី ដោះស្រាយគ្នាដោយសន្តិវិធី។ ក៏ប៉ុន្តែ លោកពុំបានថ្កោលទោសឬហៅអំពើវាយប្រហាររបស់ប្រទេសរុស្ស៊ីមកលើប្រទេសអ៊ុយក្រែនថាជាការឈ្លានពាននោះទេ ខណៈកម្ពុជាមានទំនាក់ទំនងជិតស្និទ្ធជាមួយរុស្ស៊ី។
រីឯរដ្ឋមន្រ្តីការបរទេសអាស៊ានវិញក៏បានចេញសេចក្តីថ្លែងការណ៍ស្តីពីស្ថានការណ៍នៅប្រទេសអ៊ុយក្រែននៅថ្ងៃទី២៧ ខែកុម្ភៈ បង្ហាញពីក្តីបារម្ភនិងអំពាវនាវឱ្យគ្រប់ភាគីពាក់ព័ន្ធទាំងអស់អត់ធ្មត់ដើម្បីបន្តសន្ទនាតាមគ្រប់មធ្យោបាយការទូតស្វែងរកដំណោះស្រាយដោយសន្តិវិធីស្របតាមអន្តរជាតិនិងគោលការណ៍រដ្ឋធម្មនុញ្ញនៃអង្គការសហប្រជាជាតិនិងសន្ធិសញ្ញាមិត្តភាពនិងកិច្ចសហប្រតិបត្តិការនៅតំបន់អាស៊ីអាគ្នេយ៍។
អ្នកនាំពាក្យសមាគមការពារសិទ្ធិមនុស្សអាដហុកលោក ស៊ឹង សែនករុណា មានប្រសាសន៍ថារដ្ឋាភិបាលមានកាតព្វកិច្ចជម្លៀសពលរដ្ឋកម្ពុជា ដែលកំពុងរស់នៅប្រទេសអ៊ុយក្រែនដែលកំពុងប្រឈមគ្រោះថ្នាក់ដល់អាយុជីវិត ព្រោះថា កម្ពុជាបានផ្តល់សច្ចាប័នអន្តរជាតិដែលធានានូវសិទ្ធិរស់រានមានជីវិតពលរដ្ឋរបស់ខ្លួនទោះបីពួកគេរស់នៅប្រទេសណាក៏ដោយ។ លោកសង្កេតឃើញថា ស្ថានភាពនេះរដ្ឋាភិបាលហាក់មិនទាន់មានចំណាត់ការឱ្យបានច្បាស់លាល់ដើម្បីជួយអន្តរាគមន៍ពលរដ្ឋខ្លួននៅឡើយទេ។
លោកទទូចឱ្យរដ្ឋាភិបាលអន្តរាគមន៍លើបញ្ហានេះជាបន្ទាន់ ដោយត្រូវធានាថា ពលរដ្ឋខ្មែរមិនត្រូវបាត់បង់ជីវិតក្នុងភ្លើងសង្គ្រាមនេះទេ៖ «យើងមានពលរដ្ឋដែលជាឈាមជ័រដូចគ្នានៅប្រទេសអ៊ុយក្រែន ចឹងយើងមានការព្រួយបារម្ភអំពីសេចក្តីសុខ និងសុវត្ថិភាពរបស់ពួកគាត់ ហើយទន្ទឹងនឹងការព្រួយបារម្ភនេះ យើងក៏ទទូចឱ្យរដ្ឋាភិបាលកម្ពុជាពិនិត្យមើលលទ្ធភាពយ៉ាងណាជួយឱ្យទាន់ពេលវេលា ហើយគួរជជែកបញ្ហានេះជាអាទិភាព»។
ខុសពីប្រទេសកម្ពុជាមកទល់ពេលនេះរដ្ឋាភិបាលថៃបានចាប់ផ្តើមជម្លៀសប្រជាពលរដ្ឋរបស់ខ្លួនចេញពីប្រទេសអ៊ុយក្រែនជាបណ្តើរៗមកកាន់ប្រទេសប៉ូឡូញ (Poland) ហើយ ដែលមានព្រំដែនជាប់នោះ។បន្ទាប់មកពួកគេនឹងឡើងយន្ដហោះពិសេសមកកាន់ប្រទេសថៃ។
មាត្រា៣៣នៃរដ្ឋធម្មនុញ្ញ ចែងថា «ប្រជាពលរដ្ឋខ្មែរដែលកំពុងរស់នៅឯបរទេស ត្រូវបានរដ្ឋគាំពារ»។ចំណែកមាត្រា៣៥ ចែងថា «សេចក្ដីស្នើទាំងឡាយរបស់ប្រជាពលរដ្ឋត្រូវបានទទួលការពិនិត្យ និងដោះស្រាយដោយហ្មត់ចត់ដោយអង្គការរដ្ឋ»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។