ឪពុកអ្នកអត្ថាធិប្បាយនយោបាយ លោក ស៊ន តារា គឺលោក សុខ ស៊ុនណារ៉េត បានប្ដឹងសាទុក្ខទៅតុលាការកំពូលទាមទារឱ្យដោះលែងរូបលោក។ មន្ត្រីសង្គមស៊ីវិលនៅតែចាត់ទុកក្ដីក្ដាំនេះជាប់ពាក់ព័ន្ធការធ្វើទុក្ខបុកម្នេញខាងនយោបាយ ហើយអំពាវនាវដល់រដ្ឋាភិបាលដោះលែងលោក សុខ ស៊ុនណារ៉េត ដែលជាប់ឃុំក្រោមហេតុផលនយោបាយឱ្យមានសេរីភាពវិញ។
ក្រោយសាលាដំបូងខេត្តកំពង់ស្ពឺ និងសាលាឧទ្ធរណ៍ភ្នំពេញសម្រេចដូចៗ គ្នាឱ្យលោក សុខ ស៊ុនណារ៉េត បន្តជាប់ឃុំនៅក្នុងពន្ធនាគារនោះ មេធាវីការពារក្ដីឱ្យជនជាប់ចោទបានដាក់ពាក្យប្តឹងសាទុក្ខទៅតុលាការកំពូល ដើម្បីបដិសេធដីកាឃុំខ្លួនរបស់តុលាការថ្នាក់ក្រោម។
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី ប្រាប់វិទ្យុអាស៊ីសេរីថា មូលហេតុដែលលោក សុខ ស៊ុនណារ៉េត ដាក់ពាក្យស្នើសុំនៅក្រៅឃុំ ដោយសារបញ្ហាសុខភាព ហើយមកដល់ពេលនេះគាត់នៅតែអះអាងទៅតុលាការ តាមរយៈពាក្យបណ្ដឹងថា គាត់ជាមន្ត្រីយោធាម្នាក់ដែលស្អាតស្អំ ដោយមិនបានរក្សាទុកសារធាតុញៀនដែលបានត្រូវចោទប្រកាន់នោះទេ។
លោក យិន ម៉េងលី៖ «អ្វីដែលជាការអះអាងរបស់គាត់នៅដដែល ដូចនៅសាលាដំបូង និងសាលាឧទ្ធរណ៍ពាក់ព័ន្ធរឿងថា គាត់មិនពាក់ព័ន្ធការប្រព្រឹត្តអំពើដូចការចោទប្រកាន់ទេ អ៊ីចឹងគាត់អត់ព្រមទទួលស្គាល់ទេ គាត់អត់សារភាពទេ ពាក់ព័ន្ធបញ្ហាទាំងអស់ហ្នឹង»។
ចំណែកកូនប្រុសរបស់លោក សុខ ស៊ុនណារ៉េត ម្នាក់នៅប្រទេសកម្ពុជា ប្រាប់វិទ្យុអាស៊ីសេរី សុំមិនបញ្ចេញឈ្មោះនិងសំឡេងថា ការប្ដឹងនេះ ជាការអនុវត្តទៅតាមនីតិវិធីរបស់តុលាការ។ លោកឱ្យដឹងថាបច្ចុប្បន្នលោក សុខ ស៊ុនណារ៉េត ដែលកំពុងជាប់ពន្ធនាគារខេត្តកំពង់ស្ពឺមានបញ្ហាសុខភាពដូចជា រលាកចម្រុះ ឧស្សាហ៍ក្អក ជាពិសេស នៅពេលអាកាសធាតុត្រជាក់ គាត់តែងតែឈឺចាប់ត្រង់ជង្គង់ដែលគ្រូពេទ្យវះកាត់កន្លងមក។
បើតាមលិខិតណាត់ជួបចេញដោយមន្ទីរពេទ្យជូឡាឡុងកន (Chulalongkorn) នៅទីក្រុងបាងកក ប្រទេសថៃ (Thailand) ដែលវិទ្យុអាស៊ីសេរីទទួលបាន គឺលោក សុខ ស៊ុនណារ៉េត ត្រូវជួបគ្រូពេទ្យជំនាញនៅប្រទេសថៃ ដើម្បីពិនិត្យនិងព្យាបាលជំងឺ នៅដើមមេសាខាងមុខនេះ។
វិទ្យុអាស៊ីសេរីមិនអាចទាក់ទងអ្នកនាំពាក្យតុលាការកំពូលអ្នកស្រី ម៉ៅ ធីតា ដើម្បីសាកសួរជុំវិញរឿងនេះបានទេ នៅថ្ងៃទី៣១ ខែមករា។
អត្ថបទដែលទាក់ទង៖
ជុំវិញរឿងនេះ លោក យិន ម៉េងលី បញ្ជាក់ថា បើផ្អែកលើស្ថានភាពជាក់ស្ដែងជនជាប់ឃុំមានទីលំនៅពិតប្រាកដ ជាអតីតយោធិនមានស្នាដៃចំពោះជាតិមាតុភូមិ ហើយគាត់មានវ័យចាស់ជរា ជាជនពិការមានជំងឺ ដែលត្រូវទទួលការព្យាបាលជំងឺពីគ្រូពេទ្យជំនាញជាចាំបាច់ទៀតនោះ លោកសង្ឃឹមថាតុលាការកំពូលពិចារណាក្នុងការដោះលែង លោក សុខ ស៊ុនណារ៉េត ឱ្យនៅក្រៅឃុំនៅពេលសវនាការខាងមុខ។ ផ្ទុយទៅវិញ លោកយល់ថា ការបន្តឃុំខ្លួនលោក សុខ ស៊ុនណារ៉េត ដែលមជ្ឈដ្ឋានទូទៅចាត់ទុកជារឿងនយោបាយបែបនេះនឹងមិនចំណេញអ្វីដល់រដ្ឋាភិបាល ឬស្ថានភាពប្រជាធិបតេយ្យនៅកម្ពុជាទេ។
លោក យិន ម៉េងលី៖ «រឿងនេះវាអាចជារឿងនយោបាយច្រើនជាងការអនុវត្តច្បាប់ ត្រង់ហ្នឹងហើយយើងទទូចជំហានទីស្នើសុំឱ្យដោះលែងគាត់នៅក្រៅឃុំបណ្ដោះអាសន្នសិន ទម្រាំដល់ពេលសវនាការលើអង្គហេតុ បន្ទាប់មកទៀតយើងសុំឱ្យទម្លាក់បទចោទទៅលើគាត់តែម្ដង ហើយមិនត្រឹមតែករណីលោក សុខ ស៊ុនណារ៉េត ទេ យើងចង់ឱ្យបើកលំហសេរីភាពនយោបាយ បញ្ចេញមតិនៅឆ្នាំ២០២៥ នេះ»។
កាលពីថ្ងៃទី១៣ ខែវិច្ឆិកា កងរាជអាវុធហត្ថខេត្តកំពង់ស្ពឺ បានចាប់ខ្លួនលោក សុខ ស៊ុនណារ៉េត អំឡុងពេលមេបញ្ជាការភូមិភាគ ៣ បានហៅឱ្យលោកទៅជួប។ តុលាការខេត្តកំពង់ស្ពឺ បានចោទប្រកាន់លោក ពាក់ព័ន្ធការរក្សាទុកដោយខុសច្បាប់នូវសារធាតុញៀន និងបញ្ជូនទៅឃុំបណ្ដោះអាសន្ននៅពន្ធនាគារខេត្តនេះ។ ប៉ុន្តែលោក សុខ ស៊ុណារ៉េត បានបដិសេធការចោទប្រកាន់ ដោយអះអាងថា លោកមិនបានដឹងរឿងនេះទេ តាំងពីដំបូងរហូតដល់ចាប់ខ្លួន និងមិនពាក់ព័ន្ធអង្គហេតុចោទប្រកាន់នោះឡើយ។
គណបក្សប្រឆាំង អ្នកឃ្លាំមើលចាត់ទុកសំណុំរឿងនេះថា ជាការធ្វើទុក្ខបុកម្នេញ គាបសង្កត់ឆ្លងដែន ដោយរដ្ឋាភិបាលត្រកូល ហ៊ុន ប្រើលេសចាប់លោក សុខ ស៊ុនណារ៉េត ធ្វើជាចំណាប់ខ្មាំងក្នុងគោលដៅដាក់សម្ពាធលើលោក ស៊ន តារា ពីព្រោះកាលកន្លងមក លោក ហ៊ុន សែន អូសទាញលោក ស៊ន តារា ឱ្យផ្ដាច់ខ្លួនចេញពីគណបក្សប្រឆាំងមិនបានដូចបំណង។ ពួកគាត់ទាមទារឱ្យរដ្ឋាភិបាលដោះលែងលោក សុខ ស៊ុនណារ៉េត ឱ្យមានសេរីភាពវិញ ដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។