ក្រសួងការពារជាតិ គ្រោងជ្រើសរើសទាហានបន្ថែមនៅចុងឆ្នាំ២០១៤ នេះ។ រដ្ឋមន្ត្រីក្រសួងការពារជាតិ លោក ទៀ បាញ់ កាលពីចុងសប្ដាហ៍នេះ បញ្ជាក់នៅក្នុងពិធីបិទវគ្គហ្វឹកហ្វឺនយោធានៅខេត្តកំពង់ស្ពឺថា ទាហានដែលត្រូវជ្រើសតាំងនឹងក្លាយជាកម្លាំងស្នូលដើម្បីការពារជាតិ ព្រមទាំងរក្សាសន្តិសុខសុវត្ថិភាពសង្គម និងទប់ស្កាត់បាតុកម្មអនាធិបតេយ្យជាដើម។
ក្រសួងការពារជាតិជាតិ នឹងរៀបចំសំណើជ្រើសរើសទាហាថ្មីដាក់ទៅក្នុងច្បាប់ថវិកាជាតិដែលរដ្ឋសភាគ្រោងនឹងអនុម័តនៅចុងឆ្នាំនេះ។ ប៉ុន្តែចំនួនទាហានដែលត្រូវរើសមានប៉ុន្មាននោះ មិនទាន់ដឹងនៅឡើយ។ រដ្ឋមន្ត្រីក្រសួងការពារជាតិ លោក ទៀ បាញ់ មានប្រសាសន៍ថា នៅឆ្នាំ២០១៤នេះ មានព្រឹត្តិការណ៍ជាច្រើន ដែលកងទ័ពកម្ពុជា បានប្រឈមមុខ ហើយព្រឹត្តិការណ៍ដែលគួរយកចិត្តទុកដាក់នោះ ជាការបាតុកម្មរបស់គណបក្សប្រឆាំង។ ការកើនឡើងនៃចលនាបាតុកម្ម ឬកូដកម្មក៏ជាកាលៈទេសៈដែលក្រសួងការពារជាតិ ត្រូវបន្ថែមចំនួនកងទ័ពដែរ។
លោកបន្តថា សភាពការណ៍នៅកម្ពុជា ស្ងប់ស្ងាត់នៅពេលដែលបក្សប្រឆាំងចូលសភា ប៉ុន្តែយោធាត្រូវតែត្រៀមជានិច្ចដើម្បីចូលរួមសហការ រក្សាសន្តិសុខសុវត្ថិភាពសង្គម។ លោករំពឹងថា សភានឹងឯកភាពយល់ព្រមក្នុងការបង្កើនចំនួនកងទ័ពនេះ។
ឆ្លើយតបនឹងបញ្ហានេះ មន្ត្រីអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា តំណាងរាស្ត្រគណបក្សសង្គ្រោះជាតិ នឹងតាមដានត្រួតពិនិត្យច្បាប់ថវិកាជាតិឲ្យបានដិតដល់បំផុត ព្រោះថវិកាជាតិទាំងអស់បានមកពីកម្លាំងញើសឈាមរបស់ពលរដ្ឋ។
លោកបន្តថា លោកមិនទាន់ទទួលដំណឹងថា ក្រសួងការពារជាតិនឹងជ្រើសតាំងកងទ័ពប៉ុន្មានឡើយ ប៉ុន្តែលោកគិតថា វិស័យដែលអាទិភាពសម្រាប់កម្ពុជា នៅពេលនេះ ជាវិស័យអប់រំនិងសុខាភិបាល។លោកបញ្ជាក់ថា តាមច្បាប់ មន្ត្រីនគរបាល និងអាវុធហត្ថជាអ្នកថែរក្សសន្តិសុខផ្ទៃក្នុង ហើយទាហានមិនគួរណាយកមកប្រើដើម្បីបង្ក្រាបបាតុកម្មឡើយ៖ «សំឡេង»។
កាលពីដើមខែមករា កងទ័ពពិសេសឆ័ត្រយោង ៩១១ បានបើកយុទ្ធនាការបង្ក្រាបការតវ៉ារបស់កម្មករនៅរោងចក្រយ៉ាកជីន នៅកំបូល ដើម្បីទាមទារដំឡើងប្រាក់ខែ។ ក្រុមទ័ពពិសេសទាំងនោះបានប្រើដំបងឈើ ចម្ពាមកៅស៊ូ វាយបាញ់បង្ក្រាបកម្មករនិងចាប់ខ្លួនមន្ត្រីសង្គមស៊ីវិល និងកម្មករមួយចំនួនដាក់គុកទៀតផង។ កងទ័ពពិសេស ក៏បានចេញប្រតិបត្តិការបង្ក្រាបបាតុកម្មនៅផ្លូវវ៉េងស្រេង ហើយបាញ់សម្លាប់អ្នកតវ៉ា ៥នាក់ និងបាញ់ឲ្យរបួសជិត ៤០នាក់ផ្សេងទៀត។ ក្រុមអង្គការសង្គមស៊ីវិល ក៏ធ្លាប់រិះគន់ជាច្រើនដងច្រើនសាថា កងទ័ពកម្ពុជា ស្ថិតក្រោមឥទ្ធិពលនយោបាយដែរ។
សេចក្ដីព្រាងច្បាប់ថវិកាជាតិ ឆ្នាំ២០១៤ ដែលមានចំណាយសរុបចំនួនប្រមាណជាង ៣ពាន់លានដុល្លារ គឺកើនឡើង ១៣,១% ធៀបនឹងច្បាប់ថវិកាជាតិឆ្នាំ២០១៣។ ក្នុងនោះ ច្បាប់ថវិកាជាតិឆ្នាំ២០១៤ ត្រូវបានរាជរដ្ឋាភិបាលសម្រេចបង្កើនចំណាយលើវិស័យការពារជាតិនិងសន្តិសុខ ចំនួន ១៧%។ សេចក្ដីព្រាងច្បាប់ថវិកាជាតិឆ្នាំ២០១៤ បង្ហាញថា ចំណាយវិស័យការពារជាតិ និងសន្តិសុខបែងចែកទៅក្រសួងការពារជាតិ ចំនួនជិត ៣០០លានដុល្លារ និងក្រសួងមហាផ្ទៃ សន្តិសុខសាធារណៈ ចំនួនជិត ២០០លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។