ផ្លូវលំបាកធ្វើដំណើរ និងខ្វះមណ្ឌលសុខភាព គឺជាប្រធានបទសំខាន់ ដែលពលរដ្ឋក្រាញននៀលមិនទទួលសំណងពីក្រុមហ៊ុនទំនប់វារីអគ្គិសនីសេសានក្រោមពីរ រស់នៅឃុំក្បាលរមាស និងឃុំស្រែគរ ស្រុកសេសាន ខេត្តស្ទឹងត្រែង ទទូចឲ្យក្រុមហ៊ុន និងអាជ្ញាធរខេត្ត ពន្លឿនដោះស្រាយជាអត្ថិភាព។ អ្នកភូមិថា ៥ ឆ្នាំកន្លងទៅនេះ គឺចាប់តាំងពីមានផែនការសាងសង់ទំនប់វារីអគ្គិសនីសេសានក្រោមពីរ អាជ្ញាធរខេត្ត បានបោះបង់ចោលការអភិវឌ្ឍផ្លូវនៅឃុំស្រែគរ និងឃុំក្បាលរមាសចាស់ បង្កឲ្យផ្លូវយ៉ាប់យឺនខ្លាំង ហើយក៏មានស្ត្រីមានផ្ទៃពោះម្នាក់បានរលួតកូនស្លាប់ នៅគ្រាបញ្ជូនមកមន្ទីរពេទ្យមិនទាន់ដោយសារផ្លូវលំបាកធ្វើដំណើរ។
ពលរដ្ឋក្រាញ់ននៀលទទួលគោលនយោបាយសំណង ពីក្រុមហ៊ុនទំនប់វារីអគ្គិសនីសេសានក្រោមពីររស់នៅឃុំស្រែគរ និងឃុំក្បាលរមាសចាស់ នៅតែទន្ទឹមរង់ចាំដំណោះស្រាយ ពីអាជ្ញាធរច្រើនខែមកហើយ ខណៈដែលក្រុមហ៊ុនបានបិទទ្វារទឹក ពន្លិចភូមិពួកគាត់លិចលង់ទាំងស្រុង ហើយបច្ចុប្បន្នពួកគេបានបន្តរស់នៅលើទីទួលខ្ពស់ ខ្វះទឹកស្អាតប្រើប្រាស់ គ្មានមណ្ឌលសុខភាព សាលារៀន និង ផ្លូវមិនអាចធ្វើដំណើរបាន។
ពលរដ្ឋរស់នៅឃុំស្រែគរចាស់ លោក ហ្វុត ឃឿន ឲ្យដឹងនៅថ្ងៃទី២៨ សីហាថា ថ្មីៗនេះ អាជ្ញាធរខេត្ត និងតំណាងក្រុមហ៊ុន បានដាក់លក្ខខណ្ឌ ៥ចំណុច ជាថ្នូរឲ្យពួកគាត់បញ្ចប់ការតវ៉ា និងទាមទារសំណង ដោយជំរុញឲ្យអ្នកភូមិផ្តិតមេដៃ តែពួកគេបដិសេធ។ លក្ខខណ្ឌទាំងនោះរួមមាន ស្ថាបនាផ្លូវ សាងសង់សាលារៀន បណ្ដុះបណ្ដាលគ្រូបង្រៀនសហគមន៍ សាងសង់មណ្ឌលសុខភាព និងជីកស្រះទឹក។ លោកថា អាជ្ញាធរបានដាក់លក្ខខណ្ឌទាំងនោះ ជាដំណោះស្រាយបញ្ចប់ការស្វែងរកយុត្តិធម៌តាមផ្លូវច្បាប់។ លោកគិតថា ការផ្តល់សេវាសាធារណៈ ជាកាតព្វកិច្ចរបស់អាជ្ញាធររដ្ឋ ដោយមិនត្រូវច្របាច់បញ្ចូលក្នុងគោលនយោបាយសំណងនោះទេ៖ «»
ពលរដ្ឋរស់នៅឃុំក្បាលរមាស លោក គឹម ឌឿង ឲ្យដឹងថា អ្នកភូមិបានឯកភាពផ្តិតមេដៃ ឲ្យអាជ្ញាធរ និងក្រុមហ៊ុន អនុវត្តលក្ខខណ្ឌ ៦ចំណុច ប៉ុន្តែពួកគេនៅតែបន្តទាមទារឲ្យក្រុមហ៊ុនទទួលខុសត្រូវ រាល់ការខូចខាតទ្រព្យសម្បត្តិ ផ្នូរកប់សព លំនៅឋាន ព្រៃអភិរក្ស និងផលដំណាំជាដើម។ លោករំឭកថា ស្រូវកសិកម្មរបស់ពួកគាត់រាប់សិបហិកតារ ត្រូវក្រុមហ៊ុនបិទទ្វារទឹកពន្លិចកាលពីចុងឆ្នាំ ២០១៧ រហូតមកទល់ពេលនេះ ធ្វើឲ្យពួកគាត់ខ្វះខាតស្បៀងអាហារចិញ្ចឹមជីវិត។ លោកថា បច្ចុប្បន្នពលរដ្ឋដែលក្រាញ់ននៀលមិនទទួលយកសំណង នៅតែប្រឈមវិបត្តិខ្វះខាតទឹកស្អាតប្រើប្រាស់ បានបង្ខំចិត្តប្រើទឹកក្នុងផ្ទៃអាងវារីអគ្គិសនី ព្រោះតែគ្មានជម្រើស បណ្ដាលឲ្យអ្នកភូមិជាច្រើន កើតជំងឺស្បែក និងអាសន្នរោគផ្សេងទៀត ក្នុងនោះក៏មានមនុស្ស ៤ នាក់បានស្លាប់កាលពីពេលថ្មីៗនេះ៖ «»
ថ្មីៗនេះ អភិបាលរងខេត្តស្ទឹងត្រែង លោក ជា ថាវរិទ្ធិ បានថ្លែងនៅចំពោះមុខពលរដ្ឋ ដែលក្រាញននៀលមិនទទួលសំណងពីក្រុមហ៊ុនទំនប់វារីអគ្គិសនីសេសានក្រោម២ ថា អាជ្ញាធរខេត្តនឹងពន្លឿនដំណោះស្រាយ ៦ចំណុច មកអនុវត្តឲ្យបានឆាប់ៗនេះ។ លោកថា ដំណោះស្រាយទាំងនោះរួមមាន ជួសជុលផ្លូវពីរខ្សែ សាងសង់សាលារៀន បណ្ដុះបណ្ដាលគ្រូបង្រៀនសហគមន៍ សាងសង់មណ្ឌលសុខភាព ជីកស្រះទឹក និងចុះបញ្ជីដីសមូហភាពជូនសហគមន៍ជនជាតិដើមភាគតិច។
លោក គឹម ឌឿង បន្ថែមថា ផ្លូវមួយខ្សែប្រវែងជាង ១០គីឡូម៉ែត្រ ចូលឃុំក្បាលរមាសខូចខាតទាំងស្រុង លំបាកធ្វើដំណើរយ៉ាងខ្លាំង និងត្រូវចំណាយពេលច្រើនម៉ោង ទម្រាំដល់ផ្លូវជាតិលេខ ៧៨ ចាស់។ បញ្ហានេះ សហគមន៍បានស្នើឲ្យអាជ្ញាធរ និងក្រុមហ៊ុន ពន្លឿនការសាងសង់ច្រើនខែមកហើយ។ លោកថា រយៈពេល ២ ថ្ងៃកន្លងមកនេះ មន្ត្រីជំនាញនៃក្រសួងមហាផ្ទៃ បានបណ្ដុះបណ្ដាលផ្ទាល់ ក្នុងឃុំក្បាលរមាស ពីលក្ខន្តិកៈបង្កើតសហគមន៍។ លើសពីនេះ សហគមន៍ចង់ឲ្យអាជ្ញាធរពន្លឿនចុះបញ្ជីដីព្រៃសមូហភាពរបស់សហគមន៍ដែលនៅសេសសល់ចុងក្រោយ ជាង ៤ពាន់ហិកតារ កំពុងទទួលរងការបំពានពីមជ្ឈដ្ឋានខាងក្រៅ អាររំលំឈើធ្វើអាជីវកម្មខុសច្បាប់ ដែលអាជ្ញាធរពាក់ព័ន្ធមិនអើពើថែរក្សា៖ «»
មេឃុំស្រែគរជាប់ឆ្នោតពីគណបក្សសង្គ្រោះជាតិ លោក សៀក មេគង្គ ឲ្យដឹងថា ក្រុមហ៊ុនសាងសង់ទំនប់វារីអគ្គិសនីសេសានក្រោមពីរ គឺជាអ្នកទទួលខុសត្រូវយ៉ាងសំខាន់ ដែលខ្លួនបានពន្លិចលំនៅឋាន និងភូមិកររបស់ពលរដ្ឋទាំងស្រុង និងត្រូវផ្ដល់សំណងសមរម្យដែលមានការឯកភាពពីពលរដ្ឋ បើទោះបីជាពលរដ្ឋទាំងនោះមិនទទួលយកគោលនយោបាយសំណងក្ដី៖ «»
អគ្គលេខាធិការសម្ព័ន្ធជនជាតិដើមភាគតិចកម្ពុជា លោក យុន ឡូរ៉ង់ ធ្លាប់លើកឡើងថា អាជ្ញាធរមានតួនាទីផ្ដល់សេវាសាធារណៈ មិនគួរទុកឲ្យពលរដ្ឋរស់នៅដាច់សង្វែង និងប្រឈមការលំបាកនោះទេ ហើយបញ្ហាទាំងនេះក៏ជាការទទួលខុសត្រូវរបស់ក្រុមហ៊ុន និងអាជ្ញាធរ។ លោកថា ការអូសបន្លាយពេលដោះស្រាយបញ្ហាប្រឈមរបស់អាជ្ញាធរ នឹងបង្កគ្រោះថ្នាក់ដល់សុខភាព និង អាយុជីវិតពលរដ្ឋ ដ្បិតពលរដ្ឋដែលរងគ្រោះបញ្ហានេះ កំពុងប្រឈមការលំបាកវេទនា សេដ្ឋកិច្ចធ្លាក់ចុះ និងការចំណាយពេលសាងសង់ជម្រករស់នៅដោយខ្លួនឯងជាដើម។ លើសពីនេះ ការពន្យារពេលមិនដោះស្រាយបញ្ហាដែលពលរដ្ឋជួបការលំបាក ហាក់ជាការរើសអើងដល់សិទ្ធិជនជាតិដើមភាគតិច ដោយសារអ្នកភូមិមិនទទួលសំណងពីក្រុមហ៊ុន។
មកទល់ពេលនេះ ពលរដ្ឋរស់នៅឃុំក្បាលរមាស ៥២គ្រួសារ ស្មើនិងពលរដ្ឋ ២៤២នាក់ និងឃុំស្រែគរ ៥០គ្រួសារ រាប់បញ្ចូលពលរដ្ឋបំបែកគ្រួសារ នៅមិនទាន់យល់ព្រមទទួលយកគោលនយោបាយសំណងពីក្រុមហ៊ុននៅឡើយ ហើយមកទល់ពេលនេះ ពួកគេនៅបន្តរស់នៅលើទីទួលខ្ពស់ នៅគ្រាដែលទឹកលិចលង់លំនៅឋានពួកគេទាំងស្រុង តាំងពីទំនប់វារីអគ្គិសនីសេសានក្រោមពីរបិទទ្វារទឹកជាស្ថាប័នកាលពីចុងឆ្នាំ២០១៧។
គម្រោងសាងសង់ទំនប់វារីអគ្គិសនីសេសានក្រោមពីរ បង្កើតឡើងដោយក្រុមហ៊ុនក្នុងស្រុកឈ្មោះ រ៉ូយ៉ាល់ គ្រុប ( Royal Group ) មានភាគហ៊ុន ៣៩ភាគរយ និងក្រុមហ៊ុន ឆាយណា ហាយដ្រូឡានឆាង អ៊ីនធឺណេសិនណល អ៊ីននើជី ( China 's Hydrolancang International Energy ) ប្រទេសចិន ភាគហ៊ុន ៥១ ភាគរយ និងក្រុមហ៊ុនអគ្គិសនីវៀតណាម-អន្តរជាតិ ( EVN ) មានភាគហ៊ុន ១០ភាគរយ។ គម្រោងនេះជាគម្រោងខ្នាតធំទី ១ នៅប្រទេសកម្ពុជា ដែលអនុម័តដោយសម័យប្រជុំរបស់គណៈរដ្ឋមន្ត្រីកាលពីខែវិច្ឆិកា ឆ្នាំ២០១២ និងចំណាយប្រាក់ជាង ៨០០លានដុល្លារ។ គម្រោងនេះបង្កផលប៉ះពាល់ប្រជាពលរដ្ឋជាង ១ពាន់គ្រួសារនៅភូមិចំនួន៧ ក្នុងឃុំចំនួន៤ ។ បច្ចុប្បន្ន ប្រជាពលរដ្ឋជិត ៩០ភាគរយ ទទួលយកគោលនយោបាយសំណង និងព្រមចាកចេញទៅរស់នៅតំបន់តាំងលំនៅថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។