ក្រសួងការបរទេស ច្រានចោលសេចក្ដីថ្លែងការណ៍រួម របស់ក្រុមអង្គការសិទ្ធិមនុស្សអន្តរជាតិ ដែលរកឃើញថា ការគោរពសិទ្ធិមនុស្ស និងស្ដារលទ្ធិប្រជាធិបតេយ្យនៅកម្ពុជាកាន់តែធ្លាក់ចុះ នៅក្រោយការបោះឆ្នោតឆ្នាំ២០២៣។ សង្គមស៊ីវិលថា រដ្ឋាភិបាលគួរយកចំណុចអវិជ្ជមាន ដែលសង្គមស៊ីវិលរកឃើញ ទៅកែលម្អឡើងវិញ ជាជាងបដិសេធដោយមិនបានពិនិត្យជាក់ស្ដែង។
ក្រសួងការបរទេស កាលពីថ្ងៃទី១៤ កញ្ញា បានចេញសេចក្ដីថ្លែងការណ៍បដិសេធ ទៅលើចំណុចសំខាន់ៗ ដែលក្រុមអង្គការសិទ្ធិមនុស្សអន្តរជាតិ បានរកឃើញមានដូចជា ស្ថានភាពសិទ្ធិមនុស្សនៅកម្ពុជាធ្លាក់ចុះ ការបោះឆ្នោតទូទៅនៅឆ្នាំ២០២៣ មានលក្ខណៈរឹតត្បិតលំហ មិនយុត្តិធម៌ និងមិនស្មើភាពជាដើម។ ក្រសួងការបរទេសចោទប្រកាន់ការរកឃើញនេះថា ជាការអះអាងដែលគ្មានលក្ខណៈថ្លឹងថ្លែង និងលម្អៀងទៅរកអ្នកប្រឆាំងមួយចំនួន។
ទោះជាយ៉ាងណាក្ដី ប្រធានអង្គការតម្លាភាពកម្ពុជា លោក ប៉ិច ពិសី លើកឡើងថា សេចក្ដីថ្លែងការណ៍របស់ក្រុមអង្គការសិទ្ធិមនុស្សអន្តរជាតិ មានការស្រាវជ្រាវ ដោយផ្អែកលើភស្តុតាងច្បាស់លាស់ ដូច្នេះរដ្ឋាភិបាលគួរពិនិត្យទៅលើចំណុចអវិជ្ជមាន ដែលសង្គមស៊ីវិលរកឃើញ និងសិក្សាទៅលើអនុសាសន៍ ឬដំណោះស្រាយ ដែលសង្គមស៊ីវិលលើកឡើង។
លោក ប៉ិច ពិសី៖ «បើសិនជាយើងមានឆន្ទៈចង់ដោះស្រាយបញ្ហាការរំលោភសិទ្ធិមនុស្សពិតប្រាកដមែន យើងគួរតែពិនិត្យមើលរបាយការណ៍ទាំងនោះ ហើយស្វែងយល់មើល កន្លែងណាដែលមានសច្ចៈភាពខ្ពស់ ហើយកន្លែងណាដែលយើងអាចឆ្លើយតបបាន យើងឆ្លើយតបទៅ ហើយកន្លែងណាដែលយើងគិតថា មិនត្រឹមត្រូវ យើងបដិសេធ ហើយយើងឆ្លើយតបទៅវិញទៅអ្នកសរសេររបាយការណ៍ ដែលយើងរកឃើញផ្ទុយពីការរកឃើញរបស់គេ»។
ក្រុមអង្គការសិទ្ធិមនុស្សអន្តរជាតិទាំង៨ ដែលចូលរួមក្នុងសេចក្ដីថ្លែងការណ៍នោះ មានដូចជា អង្គការឃ្លាំមើលសិទ្ធិមនុស្សអន្តរជាតិ (Human Rights Watch) អង្គការវេទិកាអាស៊ី (Forum Asia) អង្គការលើកលែងទោសអន្តរជាតិ (Amnesty International) និងអង្គការពិភពលោកប្រឆាំងអំពើទារុណកម្ម (World Organization Against Torture) ជាដើម។ សេចក្ដីថ្លែងការរួមចេញផ្សាយកាលពីថ្ងៃទី១២ កញ្ញា បង្ហាញថា ស្ថានភាពការគោរពសិទ្ធិមនុស្សនៅកម្ពុជា កាន់តែធ្លាក់ចុះ ដោយសារការធ្វើទុក្ខបុកម្នេញជាប្រព័ន្ធ លើសកម្មជនសិទ្ធិមនុស្ស បរិស្ថាន ដីធ្លី សហជីព សមាជិកគណបក្សប្រឆាំង និងប្រព័ន្ធផ្សព្វផ្សាយឯករាជ្យ តាមរយៈការបង្កើតបទចោទប្រកាន់ក្លែងក្លាយ។ សេចក្ដីថ្លែងការណ៍ដដែលបន្តថា ការបោះឆ្នោត កាលពីខែកក្កដាកន្លងទៅ មិនស្របទៅតាមគន្លងប្រជាធិបតេយ្យឡើយ ដោយសារគ្មានគណបក្សប្រឆាំង ដែលរឹងមាំចូលរួមប្រកួត ហើយនៅប៉ុន្មានថ្ងៃមុនការបោះឆ្នោត រដ្ឋាភិបាលបានបញ្ជាឱ្យក្រុមហ៊ុនផ្ដល់សេវាអ៊ីនធឺណិតបិទគេហទំព័រ និងគណនីប្រព័ន្ធផ្សព្វផ្សាយព័ត៌មានឯករាជ្យ ដែលរដ្ឋាភិបាលចោទថា ជាស្ថាប័នប្រឆាំងនឹងរដ្ឋាភិបាល។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត លើកឡើងថា រដ្ឋាភិបាលគួរពិនិត្យ កែលម្អការគោរពសិទ្ធិមនុស្ស និងស្ដារប្រជាធិបតេយ្យឡើងវិញ ដើម្បីបញ្ចៀសការរិះគន់ និងទណ្ឌកម្មពីប្រទេសលោកសេរីបន្ថែមទៀត។
លោក អំ សំអាត៖ «អ៊ីចឹងបើយើងកែប្រែចំណុចខ្វះខាត មានផលចំណេញដល់កម្ពុជាទៅវិញទេ។ ហើយប្រសិនបើជារាល់របាយការណ៍ទាំងអស់ត្រូវបានបដិសេធចោល ហើយមិនបានមើលចំណុចខ្វះខាត ឬខ្វះចន្លោះដើម្បីរកចំណុចកែលម្អ កម្ពុជាយើងនៅតែទទួលរងការរិះគន់បន្តទៀត ហើយអាចនឹងប៉ះពាល់ផលប្រយោជន៍កម្ពុជាយើងបន្តទៅទៀតដែរ»។
ជានិច្ចកាល រដ្ឋាភិបាល តែងបដិសេធចំពោះរបាយការណ៍ ឬទិន្នន័យ ដែលបង្ហាញពីអំពើពុករលួយ ការរំលោភសិទ្ធិមនុស្ស និងការបំផ្លាញលទ្ធិប្រជាធិបតេយ្យ។ រដ្ឋាភិបាលតែងតែប្រកែកថា នេះគឺជាការប្រឌិត និងមានភាពលម្អៀង បើទោះបីជារបាយការណ៍ទាំងនោះ មានប្រភព ទិន្នន័យ និងភស្តុតាងជាក់លាក់យ៉ាងណាក្ដី។
ក្រុមសង្គមស៊ីវិល ជំរុញឱ្យរដ្ឋាភិបាល គួរបើកចិត្តឱ្យទូលាយពិនិត្យមើលចំណុចអវិជ្ជមាន និងប្រើប្រាស់របាយការណ៍របស់សង្គមស៊ីវិល ធ្វើជាកញ្ចក់សម្រាប់ឆ្លុះបញ្ចាំង និងកែលម្អចំណុចខ្វះខាតរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។