អង្គការសង្គមស៊ីវិល ធ្វើយុទ្ធនាការបង្ហោះសារតាមបណ្ដាញសង្គមហ្វេសប៊ុក (Facebook)ទាមទារឲ្យក្រុមហ៊ុនណាហ្គាវើដល៍ (Naga World) បញ្ឈប់ការរើសអើងគ្រប់ទម្រង់ទៅលើសហជីព និងចូលតុចរចាដោះស្រាយបញ្ចប់វិវាទការងាររ៉ាំរ៉ៃមួយនេះ។ យុទ្ធនាការនេះ មានបំណងចង់ឲ្យសាធារណជនទូទៅ កម្មករ និងសហជីពគ្រប់វិស័យទាំងអស់ ចូលរួមគាំទ្រលើកទឹកចិត្តដល់កម្មករនិយោជិតណាហ្គាវើលដ៍ជាង១ពាន់នាក់ ដែលកំពុងធ្វើកូដកម្មទាមទារដំណោះស្រាយការងារពីក្រុមហ៊ុន។
«ណាហ្គាវើលដ៍ត្រូវបញ្ឈប់ការរើសអើងសហជីព» «ពួកយើងត្រូវការសហជីព» «សហជីពត្រូវការយើង» ទាំងនេះ គឺជាសារដែលក្រុមអង្គការសង្គមស៊ីវិល និង អ្នកប្រើប្រាស់បណ្ដាញសង្គមហ្វេសប៊ុក ឈរថតបង្ហោះនៅក្នុងគណនេយ្យរបស់ពួកគេ ខណៈវិវាទការងារនៅក្រុមហ៊ុនបនល្បែងមួយនេះ មិនទាន់មានដំណោះស្រាយនៅឡើយ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO)លោក អំ សំអាត ប្រាប់វិទ្យុអាស៊ីសេរីនៅថ្ងៃទី៣០ ខែធ្នូថា ការធ្វើយុទ្ធនាការនេះ គឺដើម្បីទាមទារឱ្យក្រុមហ៊ុនបញ្ឈប់ការរើសអើង និងឈប់លាបពណ៌មកលើសហជីព។ លោកស្នើឲ្យភាគីក្រុមហ៊ុនគួរចូលតុចរចាដោះស្រាយបញ្ចប់វិវាទការងារនេះ ដោយតម្លាភាព និងតាមច្បាប់ស្ដីពីការងារ៖ «យើងសូមឲ្យបញ្ឈប់ទម្រង់នៃការលាបពណ៌ និងការរើសអើងទៅលើសហជីពណាហ្គាវើលដ៍ហ្នឹង។ អ្វីដែលសំខាន់ គឺការរកដំណោះស្រាយ ដោយទទួលយកបានទាំងអស់គ្នា។ ហ្នឹងជារឿងមួយដែលចាំបាច់បំផុត»។
អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថា ការមិនព្រមទទួលយកកម្មករនិយោជិត និងថ្នាក់ដឹកនាំសហជីពជាង៣រយនាក់ពីខាងក្រុមហ៊ុន មកដល់ពេលនេះ គឺបង្ហាញឲ្យឃើញថា ក្រុមហ៊ុនមានចេតនាចង់រំលាយសហជីពចេញពីក្រុមហ៊ុន ព្រោះក្រុមហ៊ុនបានព្យាយាមរំលាយសហជីព៣ដងរួចមកហើយ លើកទី១នៅឆ្នាំ២០០៩ លើកទី២នៅឆ្នាំ២០១៣ និងលើកទី៣ នៅឆ្នាំ២០២០។
លោកចាត់ទុកការផ្ដាច់កិច្ចសន្យាចំពោះបុគ្គលិកជាង ៣ រយនាក់ដោយក្រុមហ៊ុនណាហ្គាវើលដ៍នេះ ថាជាការរើសអើង និងរំលោភសិទ្ធិការងារសហជីពដែលត្រូវបានការពារដោយច្បាប់។
លោកស្នើឲ្យភាគីក្រុមហ៊ុនទទួលយកបុគ្គលិកជាង៣រយនាក់ ចូលធ្វើការវិញ ហើយបើកលំហសិទ្ធិសេរីភាពការងារដល់កម្មករទៅតាមច្បាប់ ព្រោះក្រុមហ៊ុនបានដំណើរការអាជីវកម្មរបស់ខ្លួនឡើងវិញអស់ជាច្រើនមកហើយ៖ «នៅក្នុងដំណើរនៃការចរចាទាំងឡាយហ្នឹង ទោះបីក្រុមហ៊ុនលើកអំពីជំហរថា ខ្លួនមិនមានការរើសអើងសហជីព នៅតែងបង់ភាគទាន កាត់ភាគទានឲ្យសហជីពក៏ដោយ ប៉ុន្តែចេតនានៃការផ្ដាច់កិច្ចសន្យាការងារបុគ្គលិកដែលគាត់ជាប្រតិភូបុគ្គលិក ជាថ្នាក់ដឹកនាំសហជីពនេះ អាហ្នឹងជាចេតនាមិនចង់ឲ្យមានតំណាងរបស់ពួកគាត់នៅកន្លែងការងារ ដើម្បីការពារសិទ្ធិនិងផលប្រយោជន៍របស់កម្មករនិយោជិតរាប់ពាន់នាក់នៅក្នុងណាហ្គាវើលដ៍ហ្នឹង»។
វិទ្យុអាស៊ីសេរីមិនអាចការឆ្លើយបញ្ហានេះ ពីប្រធានប្រតិបត្តិបុគ្គលិករបស់ក្រុមហ៊ុនណាហ្គាវើលដ៍លោក ម៉ៃ ង៉ៃ (Mike Ngai) បានទេ នៅថ្ងៃទី៣០ ខែធ្នូ ដោយហៅទូរស័ព្ទចូល តែពុំមានអ្នកទទួល។
គិតមកដល់ពេលនេះ មានរយៈពេល ១៣ ថ្ងៃហើយ ដែលក្រុមកម្មករណាហ្គាវើលដ៍ជាង ១ ពាន់នាក់ នៅធ្វើកូដកម្មទាមទារដំណោះស្រាយការងារពីថៅកែក្រុមហ៊ុន។ ក្រុមកូដករនាំគ្នាវាយស្គរ និងស្រែកតវ៉ានៅខាងមុខក្រុមហ៊ុន ដើម្បីឲ្យថៅកែព្រមទទួលយកបុគ្គលិកនិងថ្នាក់ដឹកនាំសហជីពចូលធ្វើការវិញ។ ពួកគេនៅតែបន្តធ្វើកូដកម្មដោយសន្តិវិធីនេះ រហូតដល់មានដំណោះស្រាយដែលអាចទទួលយកបាន។
សង្គមស៊ីវិលលើកឡើងថា វិវាទការងារដែលអូសបន្លាយមកពេលនេះ ដោយសារតែភាគីក្រុមហ៊ុនគ្មានចេតនាស្មោះត្រង់ ចង់ចូលរួមដោះស្រាយបញ្ចប់រឿងនេះ។ សង្គមស៊ីវិលយល់ថា បើខាងក្រុមហ៊ុនព្រមទទួលយកបុគ្គលិកជាង៣រយនាក់ចូលធ្វើការវិញ ជម្លោះការងារមួយនេះនឹងត្រូវបានបញ្ចប់ ហើយកម្មករក៏នឹងរំសាយការធ្វើកូដកម្មដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។