ពលករខ្មែរមួយចំនួនធ្វើការនៅប្រទេសថៃប្រកាសរង់ចាំស្វាគមន៍អមដំណើរប្រធានស្ដីគណបក្សសង្គ្រោះជាតិ លោក សម រង្ស៊ី ប្រសិនបើលោកវិលចូលស្រុកវិញនៅពេលខាងមុខ។ អ្នកវិភាគនយោបាយ មើលឃើញថា លោក សម រង្ស៊ី មានលទ្ធភាពក្នុងការធ្វើមាតុភូមិនិវត្តន៍ឆ្លងកាត់ប្រទេសថៃបាន ក្រោយពេលដែលថៃប្ដូររដ្ឋាភិបាលថ្មី។
ពលករខ្មែរមួយចំនួនធ្វើការនៅប្រទេសថៃលើកឡើងថា បច្ចុប្បន្ននេះមានពលកររាប់ម៉ឺននាក់រង់ចាំអមដំណើរ លោក សម រង្ស៊ី វិលចូលស្រុកវិញ ដោយមិនខ្លាចការគំរាមរបស់លោក នាយករដ្ឋមន្ត្រី ហ៊ុន សែន ឡើយ។
ពលករមានស្រុកកំណើតនៅខេត្តកំពង់ឆ្នាំង លោក ថន ស្ដើង ប្រាប់វិទ្យុអាស៊ីសេរីនៅថ្ងៃទី១ មិថុនាថា ពលករខ្មែរនៅប្រទេសថៃជាច្រើនកន្លែងសប្បាយចិត្តនៅពេលទទួលដំណឹងថា លោក សម រង្ស៊ី នឹងវិលចូលស្រុកវិញនៅពេលខាងមុខ។ ពលករវ័យ ៤០ឆ្នាំរូបនេះ បញ្ជាក់ថា លោកនឹងពលករជាច្រើននាក់ទៀតធ្វើការនៅខេត្តជាប់ទីក្រុងបាងកក (Bangkok) ហ៊ានប្ដូរជីវិតអមដំណើរជាមួយលោក សម រង្ស៊ី វិលចូលស្រុក ដោយមិនខ្លាចលោក ហ៊ុន សែននោះទេ។
លោក ថន ស្ដើង៖ «លោក សម រង្ស៊ី គឺជាអ្នកដែលចង់បានលទ្ធិប្រជាធិបតេយ្យពិតប្រាកដ ហើយគាត់ឱ្យពលរដ្ឋដែលរងគ្រោះពីភាពអយុត្តិធម៌ក្ដី ឬពលករខ្មែរដែលចំណាកស្រុកនៅក្នុងប្រទេសថៃហ្នឹង គាត់រងទុកលំបាកពីការងារ ហើយព្រាត់ប្រាសឪពុកម្ដាយប្រពន្ធកូន។អីចឹងហើយពួកគាត់ចង់ទៅរស់នៅប្រទេសកម្ពុជាវិញ ដោយមានភាពកក់ក្ដៅដោយមានអាណាព្យាបាលត្រឹមត្រូវ។អីចឹងពួកគាត់មើលឃើញថា លោកប្រធាន សម រង្ស៊ី គាត់គឺជាមេដឹកនាំមួយ ដែលជាបង្គោលនៃលទ្ធិប្រជាធិបតេយ្យ»។
ស្រដៀងគ្នានេះដែរ ពលករមានស្រុកកំណើតនៅខេត្តបន្ទាយមានជ័យ លោក ទៀប ពិសិទ្ធ ថ្លែងថា លោកបានត្រៀមខ្លួនរួចជាស្រេច ដើម្បីអមដំណើរ លោក សម រង្ស៊ី ត្រឡប់ទៅកម្ពុជាវិញ។ ពលករធ្វើការសំណង់នៅខេត្តជាប់ទីក្រុងបាងកករូបនេះ បញ្ជាក់ថា មូលហេតុ ដែលលោកហ៊ានលះបង់អាយុជីវិតអមដំណើរមេបក្សប្រឆាំងរូបនេះ ដោយសារលោកមើលឃើញថា លោក សម រង្ស៊ី វិលចូលស្រុកនឹងធ្វើឱ្យរដ្ឋាភិបាលឯកបក្សងាកមកដើរតាមគន្លងប្រជាធិបតេយ្យឡើងវិញ។
លោក ទៀប ពិសិទ្ធ៖ «សព្វថ្ងៃបើរស់ស្មើនឹងស្លាប់ដែរ ហើយសិនជាយើងខ្លាចទៀតជីវិតយើងក៏ស្លាប់ឥតន័យដដែល។ យើងស៊ូស្លាប់ឱ្យមានន័យទៅដើម្បីឱ្យជាតិមានការកែប្រែឱ្យបានខ្ពង់ខ្ពស់ឡើងវិញ។ ខ្ញុំចង់បានប្រទេសកម្ពុជាដូចប្រទេសគេឱ្យមានការងារធ្វើ ឱ្យកូនចៅនៅជនបទបានរៀនសូត្រខ្ពង់ខ្ពស់ ដូចនៅប្រទេសថៃ»។
ការប្រកាសរបស់ពលករនេះធ្វើឡើងបន្ទាប់ពីពួកគេទទួលដំណឹងថា ប្រធានស្ដីទីគណបក្សសង្គ្រោះជាតិ លោក សម រង្ស៊ី មានគម្រោងវិលចូលស្រុកវិញ នៅពេលខាងមុខ។
ការប្រកាសធ្វើមាតុភូមិនិវត្តន៍ជាថ្មីរបស់លោក សម រង្ស៊ី នេះ បានធ្វើឲ្យលោក ហ៊ុន សែន ផ្ទុះកំហឹងលាយឡំជាមួយក្ដីបារម្ភ។ កាលពីថ្ងៃទី៣១ ឧសភា លោក ហ៊ុន សែន បានប្រកាសប្រើកាំភ្លើងធំបេអឹម (BM) ២១ បាញ់ស្លាប់លោក សម រង្ស៊ី និងបក្សពួក ប្រសិនបើពួកគេហ៊ានឆ្លងកាត់តាមព្រំដែនថៃចូលមកកម្ពុជា។
លោក ហ៊ុន សែន៖ «ហើយគ្រាន់តែថៃគេបោះឆ្នោតមានបក្សមួយនោះឈ្នះ គេថា គេជិតបានចូលស្រុកខ្មែរហើយ ចាំតើអាពៅ ចាំទៅឯងកុំភូតគេពេក។ គេស្គាល់នយោបាយថៃគេដឹងរឿងថៃច្រើនណាស់ ថៃស្មានតែសុខៗ ឱ្យអ្នកឯងមកធ្វើអីចឹងឬ ហើយខ្មែរយ៉ាងម៉េចដែរគោលនយោបាយមិនជ្រៀតជ្រែកកិច្ចការផ្ទៃក្នុង»។
ពាក់ព័ន្ធនឹងដំណឹងវិលចូលស្រុករបស់មេបក្សប្រឆាំងនេះ អ្នកនាំពាក្យគណបក្សកាន់អំណាច លោក សុខ ឥសាន ជឿជាក់ថា លោក សម រង្ស៊ី មិនហ៊ានវិលចូលស្រុកនោះទេ។ លោកបន្តថា ប្រសិនមេបក្សប្រឆាំងរួបនេះវិលចូលស្រុកមែននោះក៏មិនមានពលករខ្មែរច្រើនចាំទទួលស្វាគមន៍លោកដែរ។
លោក សុខ ឥសាន៖ «ហើយចុះបើគេប្រកាសស្វាគមន៍យ៉ាងម៉េចក៏មិនមក។ អាហ្នឹងបានសេចក្ដីថាមនុស្សហ្នឹងគ្រាន់តែយកការវិលចូលស្រុកមកធ្វើជាឧបាយកលនយោបាយ ប្រកូកប្រកាសគ្រាន់តែគោះទឹកបង្អើលត្រីទេ វាអត់មានមកទេ។ ហើយអាចយកការប្រកាសចូលស្រុកនឹងធ្វើអាជីវកម្មនយោបាយ»។
ទោះជាយ៉ាងណាក្ដី អ្នកវិភាគនយោបាយ លោក គឹម សុខ មើលឃើញថា លោក សម រង្ស៊ី មានលទ្ធភាពក្នុងការធ្វើមាតុភូមិនិវត្តន៍ដោយឆ្លងការប្រទេសថៃបាន ប្រសិនបើប្រទេសនេះបង្កើតរដ្ឋាភិបាលថ្មីដែលនាំដោយក្រុមប្រជាធិបតេយ្យ។ លោកបញ្ជាក់ថា រដ្ឋាភិបាលរបស់ថៃថ្មីនេះនឹងជួយដល់ក្រុមប្រជាធិបតេយ្យដូចគ្នា។
លោក គឹម សុខ៖ «ដោយលោក សម រង្ស៊ី ចេះធ្វើការសម្របសម្រួលនយោបាយការទូតហើយនឹងបង្កើតទំនាក់ទំនងការទូតរបស់គាត់ជាមួយបណ្ដាប្រទេសនានា ថែមទៀត មិនត្រឹមតែថៃទេ។ ទាំងថៃទាំងម៉ាឡេស៊ី ឥណ្ឌូណេស៊ី ហ្វីលីពីន ជាដើម ដើម្បីឱ្យប្រទេសថៃ និងប្រទេសមួយចំនួននៅក្នុងតំបន់អាស៊ីមើលឃើញថា វាជាកិច្ចសហប្រតិបត្តិការរួម»។
កាលពីថ្ងៃទី៩ ខែវិច្ឆិកា ឆ្នាំ២០១៩ លោក សម រង្ស៊ី បានព្យាយាមវិលទៅកម្ពុជាវិញម្ដងរួចមកហើយ តែមិនបានសម្រេច ដោយសារតែរបបលោក ហ៊ុន សែន បានដាក់កងកម្លាំងប្រដាប់អាវុធពង្រាយតាមព្រំដែនកម្ពុជាថៃ ដើម្បីរារាំង និងហាមមិនឱ្យក្រុមហ៊ុនយន្តហោះដឹកលោក សម រង្ស៊ី ទៅកម្ពុជា និងថែមទាំងស្នើឲ្យមេដឹកនាំប្រទេសជាសមាជិកអាស៊ានរួមទាំងប្រទេសថៃ ជាដើម កុំអនុញ្ញាតឲ្យលោក សម រង្ស៊ី ជាន់ទឹកដី។ កាលនោះ ក៏មានពលករខ្មែររាប់ពាន់នាក់រង់ចាំអមដំណើរជាមួយលោក សម រង្ស៊ី នៅប្រទេសថៃដែរ។
លោក ហ៊ុន សែន ធ្លាប់ទទួលបានជោគជ័យកាលពីឆ្នាំ២០១៩ ដោយលោកស្នើឲ្យរដ្ឋាភិបាលយោធាថៃ គឺលោក ប្រាយុទ្ធ ចាន់អូចា មិនឲ្យលោក សម រង្ស៊ី ប្រើប្រាស់ទឹកដីថៃ ដើម្បីដឹកនាំអ្នកគាំទ្រលោកវិលទៅកម្ពុជាវិញ។ ក៏ប៉ុន្តែសម្រាប់បរិបទនយោបាយនៅថៃនាពេលនេះវិញ ខុសពីមុន ពោលគឺ រដ្ឋាភិបាលរបស់លោក ប្រាយុទ្ធ ចាន់អូចា (Prayuth Chan-Ocha) បានចាញ់ការបោះឆ្នោត កាលពីពេលថ្មីៗ នេះ។ ក្រុមអ្នកវិភាគមើលឃើញថា គណបក្សប្រឆាំងនៅថៃឈ្នះការបោះឆ្នោតនេះ ក៏ជារបត់មួយថ្មីទៀត សម្រាប់លោក សម រង្ស៊ី ក្នុងការវិលទៅកម្ពុជាវិញ។
អ្នកវិភាគ លោក គឹម សុខ លើកឡើងថា ប្រសិនបើលោក សម រង្ស៊ី ត្រឡប់ទៅកម្ពុជាវិញនៅពេលខាងមុខមែននោះ នឹងធ្វើឱ្យរាំងស្ទះដល់ដំណើរការផ្ទេរអំណាចរបស់លោក ហ៊ុន សែន ទៅកូនប្រុសច្បង គឺ លោក ហ៊ុន ម៉ាណែត ព្រោះលោកមិនអាចទប់ស្កាត់ក្រុមប្រជាធិបតេយ្យបាននោះទេ ហើយធ្វើឱ្យប្រជាធិបតេយ្យនៅកម្ពុជារស់ឡើងវិញ៕
កំណត់ចំណាំចំពោះអ្នកបញ្ចេញមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិ ដែលមិនជេរប្រមាថដល់អ្នកដទៃប៉ុណ្ណោះ។