ក្រសួងសុខាភិបាល រកឃើញអ្នកឆ្លងជំងឺកូវីដ-១៩ ចំនួន ៣៥៦ករណីថ្មីទៀត ដែលសុទ្ធតែជាមេរោគ អូមីក្រុង (Omicron) ក្នុងនោះ ១៤នាក់ ជាករណីនាំចូល និង ៣៤២នាក់ទៀតជាករណីឆ្លងក្នុងសហគមន៍។ នេះគឺជាលទ្ធផល ដែលបញ្ជាក់ដោយម៉ាស៊ីនពិសោធន៍ ភី.ស៊ី.អា (PCR)។
នៅថ្ងៃដដែលនេះ លោកនាយករដ្ឋមន្ត្រី ហ៊ុន សែន ក៏បានប្រកាសបញ្ចប់ការធ្វើចត្តាឡីស័ក និងចេញធ្វើការឡើងវិញដូចធម្មតា បន្ទាប់ពីធ្វើតេស្តអវិជ្ជមានកូវីដ-១៩។ កាលពីថ្ងៃទី២៥ ខែកុម្ភៈ កន្លងទៅ លោក ហ៊ុន សែន បានប្រកាសលើទំព័រហ្វេសប៊ុក(Facebook)ផ្លូវការរបស់ខ្លួនថា លោក ធ្វើចត្តាឡីស័កមួយរយៈពេលខ្លី ដោយសារបានប៉ះពាល់ដោយផ្ទាល់ជាមួយអ្នកវិជ្ជមានកូវីដ១៩។
គិតត្រឹមព្រឹកថ្ងៃទី២៨ កុម្ភៈ កម្ពុជា មានអ្នកកើតជំងឺកូវីដ-១៩ ជាង ១៣ម៉ឺននាក់ (១៣០.២៧៦) ក្នុងនោះអ្នកជាសះស្បើយមានជាង ១២ម៉ឺននាក់ (១២៣.៧៧២) និងអ្នកស្លាប់មានចំនួន ៣.០៣២នាក់។
ចំពោះការចាក់វ៉ាក់សាំងវិញ ក្រសួងសុខាភិបាល ប្រកាសថា គិតត្រឹមថ្ងៃទី២៧ កុម្ភៈ រដ្ឋាភិបាលចាក់វ៉ាក់សាំងគ្រប់ដូសជូនពលរដ្ឋបានជាង ១៣លាន ៨សែននាក់ ក្នុងចំណោមពលរដ្ឋដែលត្រូវចាក់ប្រមាណ ១៤លាននាក់ ដែលរាប់ពីកុមារអាយុចាប់ពី ៥ឆ្នាំរហូតដល់មនុស្សពេញវ័យ។ រីឯដូសជំរុញទី៣ និងទី៤ វិញ រដ្ឋាភិបាលចាក់ជូនពលរដ្ឋបានសរុបជាង ៧លាន ៩សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។