អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ឬសាលាក្ដីខ្មែរក្រហមតែងតាំងចៅក្រមអន្តរជាតិថ្មីនៃអង្គជំនុំជម្រះតុលាការកំពូលជំនួសចៅក្រមចាស់ ដែលលាឈប់។
អ្នកស្រី Katrien Gabriël WITTLEMAN ជនជាតិហូឡង់ (Netherlands) ចូលមកកាន់តំណែងជាចៅក្រមអន្តរជាតិ នៃអង្គជំនុំជម្រះតុលាការកំពូលជំនួសចៅក្រម Maureen Harding CLARK ជនជាតិអៀរឡង់ ដែលបានលាឈប់ពីមុខតំណែងក្នុងខែកញ្ញា ឆ្នាំ២០២២។ ជាមួយគ្នានេះលោក Motoo NOGUCHI (ជនជាតិជប៉ុន) ចូលកាន់តំណែងជាចៅក្រមអន្តរជាតិបម្រុងនៃអង្គជំនុំជម្រះតុលាការកំពូលជំនួសចៅក្រមបម្រុង RAPOZA បន្ទាប់ការលាឈប់ពីមុខតំណែងរបស់គាត់ក្នុងខែកុម្ភៈ ឆ្នាំ២០២៤។ ។ ចំណែកចៅក្រមបម្រុង Philip RAPOZA ជនជាតិអាមេរិក ចូលទៅកាន់តំណែងជាចៅក្រមនៃអង្គជំនុំជម្រះតុលាការកំពូលដែរ។
អង្គជំនុំជម្រះតុលាការកំពូលត្រូវមានសមាសភាពចៅក្រមខ្មែរ ៤រូប ចៅក្រមអន្តរជាតិបីរូប និងចៅក្រមបម្រុង។
បន្ទាប់ពីបញ្ចប់ដំណើរការកាត់ក្តីរបស់ខ្លួនអ.វ.ត.ក បានចាប់ផ្តើមមុខងារសេសសល់នៅខែមករា ឆ្នាំ២០២៣ សម្រាប់រយៈពេលបីឆ្នាំដំបូង ស្របតាមកិច្ចព្រមព្រៀងបន្ថែមទៅនឹងកិច្ចព្រមព្រៀងរវាង អ.ស.ប និងរាជរដ្ឋាភិបាលកម្ពុជា ទាក់ទងនឹងអ.វ.ត.ក។ យោងតាមកិច្ចព្រមព្រៀងបន្ថែមនេះ ចៅក្រមជាតិ និងអន្តរជាតិ សហព្រះរាជអាជ្ញាជាតិ និងអន្តរជាតិ សហមេធាវីនាំមុខតំណាងដើមបណ្ដឹងរដ្ឋប្បវេណីជាតិ និងអន្តរជាតិ បំពេញការងារពីចម្ងាយ លើកលែងតែនៅពេលដែលមុខងាររបស់ខ្លួនតម្រូវឱ្យមានវត្តមានផ្ទាល់នៅអង្គជំនុំជម្រះវិសាមញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។